REDAKSIONALE/ Vrasja e të rinjve çekë: mos vallë kemi të bëjmë me një akt “terrori turistik”?!

Vrasja e makabre e dy të rinjve nga Çekia, Michael Svatos dhe Anna Kosinova, teksa po ktheheshin nga Dukagjini, sipas të dhënave që dalin vazhdimisht, duket se është një akt i pastër dhe i qartë terrorist, e ndoshta me prapavijë turistike me qëllim baltosje imazhi.

Kjo pasi vrasja nuk ka pasur as qëllime grabitje, as motive të dobëta dhe asnjë prej detajeve momentale që çon në një krim ordiner.

Sipas gjasave, kemi të bëjmë me një atentat të kryer nga një person i cili është marrë në makinë nga të rinjtë dhe në bashkëpunim me një grup tjetër ka inskenuar pritën, por që vrasja është bërë nga prapa. Një atentat që ka një qëllim të caktuar. Atentatet kryhen përgjithësisht ose për mesazh ose për grabitje.

Përfaqësues i një agjencie turistike në Çeki, i cili merret me dërgimin e turistëve kryesisht të rinj në alpet shqiptare, deklaroi se Shqipëria konsiderohej një vend i sigurtë. Dhe në fakt ka prej më shumë se një vit që disa raporte ndërkombëtare, që pas verës së shkuar theksojnë se indeksi i sigurisë në Shqipëri është pozitiv.

Harta e nxjerrë nga Ministria e Jashtme italiane, e cila shpesh është “qibare” me Shqipërinë, është një fakt shtesë për këtë aspekt. Dhe frytet e këtij cilësimi ndërkombëtar po vinin avash avash.

Në bujtinat dhe hotelet e veriut që prej një viti tejmbusheshin me turistë nga shtetet e Europës Qendrore si Polonia e Çekia, të cilët vijnë për arsye të çmimeve të ulëta dhe relievit të ndryshëm, pra me një javë mund të shkojnë edhe në det edhe në mal.

Por ngjarja e fundit është një grusht i fuqishëm që trondit këtë imazh dhe mund të prodhojë një reaksion të fortë zinxhir.

Disa vizita të rëndësishme politike si ajo e Papa Françeskut dhe ajo e zonjës Merkel javën e ardhshme i japin një “injeksion” imazhit të vendit dhe krijojnë premise që agjencitë e vlerësimit për bisnesin, të vendosin kuota të larta, të cilat dhe kanë ndodhur.

Por një ngjarje makabre, si vrasja e dy të rinjve, i jep një devijim dhe krijon gjasat e një rikthimi në qerthullin e kaosit, duke bindur njerëzit se “ky vend s’bëhet” dhe e vetmja rrugëzgjidhje është largimi.

Policia është para një sprove të madhe, ndoshta më të madhe se ajo e vrasjes së bankierit Artan Santo, e cila nuk u zbardh kurrë. Mungesa e parandalimit të krimeve të tilla kërkon një reagim më shumë se normal dhe pa asnjë fjalë e propagandë, por vetëm të kapen autorët.

Dukagjini nuk është vend i madh dhe nuk është shumë e vështirë të rrethohet rrethi i njerëzve të krisur që mund të kryejnë krime të tilla. Banorëve të zonës nuk u intereson asnjëherë, pasi për herë të parë në 20 vjet atyre u është krijuar një dritare për të jetuar me të mirat që u ka falur Zoti.

Është shumë e çuditshme, por sa u mbyllën qetësisht zgjedhjet, ndodhi “Lazarati”, ku u vra oficeri i RENEA-s, i ndjeri Ibrahim Basha dhe tani ndodhi gjëma tjetër.

Tek ne krimet kur ndodhin, bëhen me “fushata”; kështu ndodhi me zinxhirin e tritoleve apo edhe me hedhjen në erë të shtyllave të tensionit. Të jetë rastësi…?! /tesheshi.com/