Qytetarët e Shkodrës kanë zhvilluar sonte një procession paqeje dhe nderimi për të dy të rinjtë nga Çekia që u vranë barbarisht në rrugë pranë Dukagjinit, pjesë e bashkisë së re të Shkodrës.
Qytetarët kanë zhvilluar një tubim në heshtje në qëndër të qytetit për të sensibilizuar organet për të gjetur vrasësit dhe për të treguar distancimin e opinionit public ndaj ngjarjeve të tilla.
Marshimi-homazh i qindra qytetarëve ka nisur tek shatërvani dhe ka vazhduar në rrugën pedonale të qytetit.
Qytetarët në krye të tubimit mbanin edhe flamurin çek ashtu siç një prej turistëve kishte postuar në rrjetet sociale flamurin shqiptar duke u valëvitur, vetëm dy ditë para se të vritej.
Fotot e dy viktimave qëndronin në krye të kortezhit, për të dhënë mesazhin se e gjithë Shkodra merr pjesë në hidhërimin e familjarëve të viktimave dhe se, një dorë krimi nuk mund të njollosë një popull.
Turistët Michal Svato dhe Anna Kosinova u vranë një natë më parë në fshatin Prekal të Dukagjinit. /tesheshi.com/
