Ish-simboli i industrisë jugosllave të automobilave, Yugo legjendare, po rihyn në skenë – këtë herë në një pamje moderne. Pasi u njoftua rilançimi i markës në fillim të këtij viti, maketi i parë i modelit të ardhshëm u shfaq në Eventin prestigjioz të Dizajnit të Makinave 2025 në Mynih.
Ky koncept tregon qartë se Yugo i ri do t’i qëndrojë besnik linjave origjinale, por me shtesa të shumta moderne si ndriçimi LED, një logo e ndriçuar dhe një dizajn minimalist.
Ky model i ri është krijuar nga dizajneri serb Darko Marçeta, nën drejtimin e Aleksandar Bjeliç nga Gjermania, i cili bleu të drejtat e markës Yugo dhe po udhëheq projektin për ta ringjallur atë. Bjeliç, i cili ka përvojë të gjerë në industrinë e automobilave, tha se modeli i ri nuk është vetëm një kujtesë për të kaluarën, por ofron edhe një karakter modern, të përballueshëm dhe sportiv.
Nëse planet zbatohen sipas njoftimeve, Yugo i ri mund të shfaqet në rrugë brenda dy vitesh. Do t’i përkasë segmentit B – klasës së makinave të vogla të qytetit – dhe me përmasat e saj prej rreth katër metrash, do të konkurrojë me modele të tilla si Renault Clio, Dacia Sandero dhe Citroën C3.
Është planifikuar një gamë e gjerë motorësh – nga motorët klasikë me aspiratë natyrale ose me turbokompresor, deri te një version elektrik në të ardhmen. Blerësit do të jenë në gjendje të zgjedhin midis transmisioneve manuale dhe automatike. Për më tepër, është njoftuar një version sportiv i modelit dhe do të prezantohet në shtator 2025 në shfaqjen CDE Classic.
Versioni përfundimtar i makinës, ose më saktë një prototip funksional, do të prezantohet për herë të parë në panairin e Beogradit në vitin 2027. Kthimi i Yugo-s ka ngjallur interes të madh, veçanërisht midis entuziastëve të makinave nga ish-Jugosllavia, dhe prodhuesit shpresojnë që dizajni nostalgjik i kombinuar me një çmim të përballueshëm dhe teknologji moderne do të joshë brezat e rinj të shoferëve.
Yugo është një makinë që përdorej rëndom edhe nga shqiptarët në ish-Jugosllavi.
Por tani janë rrethana krejt të tjera dhe me gjasë shqiptarët e Kosovës apo të Maqedonisë vështirë se do zgjidhnin të kishin një automjet me pasaportë serbe. Vetëm nëse nostalgjia për të djeshmen, te ata që jetojnë ende me kujtimet e Jugosllavisë, do preferonin emocionalisht markën e dikurshme. /tesheshi.com/
