Ministri izraelit i Financave, Bezalel Smotrich, zbuloi të martën se qeveria izraelite do të miratojë planet për të ndërtuar vendbanime hebraike në zonën E1 në lindje të Jerusalemit të pushtuar brenda disa muajve të ardhshëm. Një vendim i tillë synon të ndajë pjesën veriore të Bregut Perëndimor nga ajo jugore, e gjitha me qëllim që të parandalojë çdo mundësi të krijimit të një shteti palestinez.
Ndërsa merrte pjesë në “Konferencën e Vendbanimit”, të organizuar nga gazeta e krahut të djathtë Makor Rishon në vendbanimin e Ofras, Smotrich tha: “Me këtë hap, ne në fakt po e shkatërrojmë projektin e një shteti palestinez”.
Ky sionist ekstremit theksoi se qeveria izraelite po përpiqet të imponojë “sovranitet de facto” mbi Bregun Perëndimor, duke theksuar se vetëm deklarata e sovranitetit nuk është e mjaftueshme nëse nuk përkthehet në veprime në terren, veçanërisht në dritën e qëndrimeve në ndryshim të SHBA-së.
Smotrich shpjegoi se që nga fillimi i këtij viti, qeveria izraelite ka miratuar ndërtimin e afërsisht 15,000 njësive të banimit dhe ka ndarë 7 miliardë shekel për projekte infrastrukturore në Bregun Perëndimor, duke përfshirë ndërtimin e rrugëve të reja, një hap drejt rritjes së numrit të kolonëve në një milion.
Zona E1, e cila shtrihet në një sipërfaqe prej 12 kilometrash katrorë, është arteria kryesore që lidh pjesët veriore dhe jugore të Bregut Perëndimor. Duke pushtuar këtë pjesë dhe duke ndërtuar vendbanime hebraike, Izraeli do ta ndajë Bregun Perëndimor.
Planet për ndërtimin datojnë që nga koha e qeverisë së Yitzhak Rabin, në vitin 1995, por zbatimi i tyre është shtyrë vazhdimisht për arsye politike.
Izraeli tani po e përdor tani luftën në Gaza për të arritur atë qëllim dekadash të vjetër. /tesheshi.com/
