Numërimi po i afrohet fundit në zgjedhjet historike në Turqi, duke na dhënë një tablo të ndryshme nga ajo që jemi mësuar të shohim në vitet e fundit. AKP-ja, partia e udhëhequr nga Ahmet Davutogllu, i ka fituar sërish ato, por i duhet të bëjë një koalicion për të formuar qeverinë e re.
Sipas të dhënave të fundit, kur numërimi ka arritur në 95%, Partia për Drejtësi dhe Zhvillim, AKP-ja, kryeson me 40.9%, pas saj vjen CHP-ja, partia kryesore e opozitës, me 25.2%. Partia e tretë është MHP-ja, me 16.5%, dhe në vend të katërt gjendet surpriza e këtyre zgjedhjeve, partia prokurde, HDP-ja, e cila ka kaluar pragun elektoral, dhe ka siguruar 12.6 % të votave.
AKP-ja ka fituar, por ka një tretje të numrit të deputetëve. Vetëm 259 janë deputetët e nxjerrë nga partia në pushtet, shumë më pak se në zgjedhjet e shkuara, në ato të 2011-ës.
CHP-ja ka deri tani 131 deputetë, 82 ka MHP-ja, dhe 78 HDP-ja.
Ende pa përfunduar procesi elektoral, kanë nisur të dëgjohen zërat për zgjedhje të parakohshme. Skema e krijimit të koalicioneve është shumë e vështirë të parashikohet tani, veçse dihet mirë se qeverisja me koalicion nuk është një zgjidhje e dëshiruar për AKP-në.
Gjërat priten të qartësohen nesër, por fjala që pritet të mbajë sonte kryeministri Ahmet Davutoglu ka për të hedhur paksa dritë mbi atë çka pritet të ngjasë. Ai është parë të largohet i buzëqeshur nga qyteti i Konjës, dhe komenti i tij i parë për zgjedhjet ka qenë ky, “Vendimi i popullit është vendimi më i drejtë!” /tesheshi.com/
