Mijëra njerëz dolën në rrugët e Jerusalemit kundër kryeministrit izraelit Benjamin Netanyahu, duke e akuzuar atë për devijim jodemokratik dhe për vazhdimin e luftës në Rripin e Gazës pa menduar për 58 pengjet që Hamasi ende mban në enklavë.
Ky tubim, më i madhi që është zhvilluar në kryeqytetin izraelit prej disa muajsh, u organizua nga grupe kundërshtarësh të Netanyahut të cilët po protestonin kundër vendimit të tij për të shkarkuar Ronen Bar, kreun e Shërbimit të Sigurisë së Brendshme (Shin Bet).
Pas njoftimit për shkarkimin e Bar, sulmet izraelite në Gaza rifilluan dhe kështu në demonstratën e mbajtur para Knesset-it morën pjesë edhe organizata të familjeve dhe të afërmve të pengjeve. “Ne shpresojmë që i gjithë populli i Izraelit do t’i bashkohet lëvizjes dhe do të vazhdojë derisa të rivendoset demokracia dhe të lirohen pengjet,” tha 68-vjeçari Zeev Berar, i cili udhëtoi për në Jerusalem nga Tel Avivi për të marrë pjesë në protesta.
“Ti je lideri, është faji yt” dhe “keni gjak në duart tuaja”, thërriste turma, duke iu drejtuar Netanyahut. Të tjerë mbanin pankarta me sloganin “Ne jemi të gjithë pengje“, ndërsa disa u bënë thirrje Shteteve të Bashkuara, një aleat historik i shtetit hebre, të “shpëtojnë Izraelin nga Netanyahu”.
Duke miratuar goditjet e reja në Rripin e Gazës, Netanyahu, siç besojnë familjarët e pengjeve, i “sakrifikoi”, pasi mund të jenë ndër dhjetëra personat që kanë humbur jetën në dy ditët e fundit në enklavën palestineze. Nga 251 personat e rrëmbyer në sulmin e paprecedentë të Hamasit ndaj Izraelit më 7 tetor 2023, 58 mbeten ende në Gaza, nga të cilët 34 janë të vdekur, sipas ushtrisë izraelite.
Protestuesit akuzuan Netanyahun për shfrytëzimin e luftës kundër Hamasit për të heshtur kritikët e tij të brendshëm dhe për të grumbulluar më shumë pushtet. Një plan për të reformuar sistemin gjyqësor, i cili parashikonte kufizimin e kompetencave të Gjykatës së Lartë, shkaktoi protesta të mëdha në fillim të vitit 2023, duke e ndarë keq Izraelin.
“Dy vitet e fundit kanë qenë një makth, ka ardhur koha për të shpëtuar vendin dhe demokracinë,” tha Yael Baron, një 55-vjeçar banor në Modin.
Kryeministri izraelit njoftoi të dielën se do të shkarkojë kreun e Shin Bet, duke pretenduar se nuk ka më “besim” tek ai pas dështimit të agjencisë për të parandaluar sulmin e përgjakshëm të 7 tetorit. Qeveria Netanyahu ka nisur edhe procesin e shkarkimit të prokurores së përgjithshme të vendit, e cila ka shprehur rezerva për politikën që ai po ndjek. /tesheshi.com/
