Vahide Badivuku, prokurorja e Krimeve të Rënda në Mitrovicë, e arrestuar per marrje rryshfeti, ka qenë e akuzuar edhe dy vjet më parë për të njëjtën vepër penale, por që më pas nuk pati pasoja. Kështu në vitin 2012, Prokuroria e EULEX e akuzoi Badivukun se ka bërë marrëveshje për të zbutur kërkesën për dënim ndaj të biznesmenit të lidhur me krimin Zvonko Veselinoviç i cili është dhe një nga baronët e veriut të Kosovës.
EULEX, gjatë një hetimi ndaj ish-komandantit të stacionit policor në veri, zbuloi se prokurorja e atëhershme që punonte në Prokurorinë Komunale të Mitroviçs ka negocuar me dy policë serbë, për “zbutje të masave për të dyshuarit për shumë krime Zvonko Veselinoviç”.
Por Policia e Shtetit, në një raport të saj deklaroi se akuzat ndaj zonjës Badivuku kanë qenë të padrejta dhe bëri të ditur se ajo është e pastër. Më 1 janar 2013, nga prokuroria komunale e Mitrovicës, Vahide Badivuku u emërua në Departamentin e Kimeve të Rënda, pra me ngritje në detyrë. Ajo ka qenë edhe prokurorja e rastit të Gani Gecit, ku ish-deputeti I LDD-së së Kosovës qëlloi me pistoletë ndaj Ruzhdi Shaqirit. Në atë kohë, Badivuku u akuzua se ka nxjerrë nga dosja hetimore në public, pjesë që mund të ndikonin për ta prishur hetimin.
Arrestimi
Është arrestuar një tjetër emër i rëndësishëm i drejtësisë në Kosovë, pas kreut të Gjykatës së Apelit. Në pranga ka rënë këtë here: Prokurorja e Krimeve të Rënda të Mitrovicës, Vahide Badivuku e akuzuar se ka marrë rryshfet për të liruar disa vetura të sekuestruara.
Prokuroria Speciale e Republikës së Kosovës ka konfirmuar arrestimin e prokurores Vahide Badivuku bashkë me arsyen e arrestimit të saj. Në një komunikatë të lëshuar pak orë pasi asaj iu vunë prangat, Prokuroria Speciale thotë se pas hetimeve të gjata, të udhëhequra nga një prokuror vendës i Prokurorisë Speciale të Republikës së Kosovës, në bashkëpunim me Policinë e Kosovës, në orët e hershme të mëngjesit të sotëm janë arrestuar tre persona, prej tyre: një prokurore, nga Departamenti për Krime të Rënda në Prokurorinë Themelore të Mitrovicës, si dhe dy ndërmjetësues, ndërsa ndërmjetësuesi i tretë gjendet në arrati.
Sipas prokurorisë, të arrestuarit dyshohen për veprat penale të marrjes së ryshfetit, keqpërdorimit të pozitës apo autoritetit zyrtar dhe asaj të ushtrimit të ndikimit. Prokuroria thotë se Badivuku është arrestuar nën dyshimin se ka marrë ryshfet për t’i liruar disa vetura të sekuestruara, në një lëndë penale, të cilën ajo e ka pasur në hetime.
“V.B. ka kërkuar ryshfet në shumën prej 22.000 euro përmes ndërmjetësuesve dhe pas dorëzimit të shumës në fjalë, si prokurore e rastit ka përpiluar kërkesën për lirim të automjeteve”, thuhet në komunikatën e prokurorisë. Sipas prokurorisë, gjatë kontrollit në pikë kalimin kufitar në Merdare, është kontrolluar e pandehura dhe në çantën e saj janë gjetur shuma prej 5.000 euro, të cilat janë pjesë e 22.000 eurove të pranuara ryshfet./tesheshi.com/
