Plaku gjithnjë i ri: Trupi, dhuratë nga Allahu!

Tetëdhjetë e një vjeçari palestinez Bedii Duveykat, i cili merret me bodybuilding në Bregun Perëndimor të pushtuar, befason me pamjen e tij të shëndetshme pavarësisht moshës së shtyrë.

Duveykat, i cili jeton në Nablus në Bregun Perëndimor verior, ndihet sikur është maksimumi 35-40 vjeç, falë bodybuilding-ut që ka bërë që nga viti 2005, pas daljes në pension.

Ai tha se stërvitet deri në dy orë çdo ditë. Ky 81-vjeçar tha se shpirti i tij nuk plaket.

“Ka një mendje të shëndoshë në një trup të shëndoshë. Një person që merret me sport bëhet më i shëndetshëm mendërisht. Sporti është vërtet i nevojshëm. Sporti është një metodë bazë për trajtimin e disa zakoneve të këqija, veçanërisht sepse i pengon të rinjtë nga pirja e duhanit dhe mbron trupin nga shumë sëmundje”, tha Duveykat.

Pasioni i tij për sportin daton që në fëmijëri.

“Unë kam luajtur shumë sporte që kur isha 12 vjeç, duke përfshirë volejboll, pingpong dhe boks. Megjithatë, prioritetet tona ndryshuan pasi Izraeli pushtoi Bregun Perëndimor në 1967,” tha Duveykat.

Ai ishte në paraburgim administrativ në burgjet izraelite për dy vjet, dhe më pas u deportua në Jordani në vitin 1970. Duveykat deklaroi se ai u kthye në Bregun Perëndimor në 1999.

“Pasi dola në pension, kisha shumë kohë të lirë. Një ditë pashë pajisjet e palestrës në shtëpinë e një miku. Aty nisa stërvitjet. Pas asaj dite vendosa t’i kthehesha pasionit tim të fëmijërisë dhe merrem me sport rregullisht çdo ditë që nga viti 2005”, tha Duveykat.

Ai tha se ndihet më mirë dhe kujdeset për shëndetin dhe trupin e tij duke u marrë çdo ditë me sport.

“Njerëz më të rinj se unë i shoh me sëmundje të ndryshme sikur të ishin 100 vjeç. Disa ecin me paterica. Prandaj u rekomandoj sport njerëzve të të gjitha moshave”, tha Duveykat.

Siç tha ai, falë sportit që bën, ka trupin e një 35-40 vjeçari. Ai ka deklaruar gjithashtu se kujdeset për dietën e tij.

“Gjëja më e mirë është që trupi im nuk është i rënduar në këtë moshë”, tha Duveykat.

 “Shëndeti është dhuratë nga Allahu dhe është detyra jonë të kujdesemi për të”, konkludon dhe fetarisht ai.

Ai theksoi se shumë njerëz në moshën e tij kanë sëmundjen e Alzheimerit.

“Për fat të mirë, jam ende i shëndetshëm, fizikisht dhe mendërisht”, shtoi Duveykat. /tesheshi.com/