Qeveria e Gruevskit, e paaftë për të përballuar një dyndje të emirgrantëve nga Lindja e Mesme, po e transferon krizën në Luginën e Preshevës, ndërkohë që ka akuzuar Greqinë për komplot.
Strukturat e policisë së tre vendeve Maqedonisë, Greqisë dhe Serbisë janë mbledhur sot në një takim urgjent në vendkalimin kufitar Bodgoricë. Në fokus të këtij takimi ka qenë kriza e emigranteve në këto tre shtete dhe gjetja e një zgjidhjeje për situatën problematike. Siç njofton Al Jazzera, efektivët e policisë kërkojnë shtimin e kontrollit për emigrantët që kalojnë kufirin. Maqedonia ka akuzuar Greqinë me pretendimin se kjo e fundit i lejon qëllimisht emigrantët të kalojnë pikën kufitare të Gjevgjelisë.
Përgjatë kufijve të dy shteteve janë vendosur forca policie, automjete të blinduara, si dhe janë ngritur gardhe me tela me gjemba për të ndaluar mësymjen e emigrantëve. Policia maqedonase dy ditë më parë ka përdorur gaz lotsjelles dhe plumba gome për të shpërndarë mijëra emigrant të ardhur nga Lindja e Mesme, Afrika dhe Azia.
Presheva
Kriza e emigrantëve po transferohet nga Maqedonia në Preshevë. Sipas raportimeve më shumë se 3 mijë vetë kanë mbërritur në kryeqendrën e Luginës së banuar me shqiptarë përmes zonës kufitare në rajonin e Tabanocës dhe Llojanit.
Bëhet fjalë për një kolonë të gjatë të emigrantëve prej gjysmë kilometri pranë kësaj qendre, Emigrantët kanë rrëfyer se në Serbi kanë hyrë pa problem pas golgotës dhe terrorit që kishin përjetuar për tre ditë në kufirin Maqedoni – Greqi dhe urdhërit të autoriteteve maqedonase për moslejimin e hyrjes së tyre.
Autoritetet serbe kanë thënë se janë në gatishmëri dhe se ministri i mbrojtjes, Bratislav Gashiç vizitoi Preshevën për t`u njohur me gjendjen e emigrantëve. Ndihmat emergjente i kanë sjellë aktivistët e UNHCR-së dhe Kryqit të Kuq.
Shumica e emigrantëve që dje gjatë orëve të vona të mbrëmjes kanë arritur në Tabanoc, e kanë kaluar kufirin Maqedono-Serb. Tani pritet vala e re e emigrantëve që ende po presin të nisen me dy trena dhe autobusë nga Gjavgjelia. Në zonën meskufitare të Greqisë dhe Maqedonisë njoftohet se tashmë nuk ka asnjë emigrant. Të gjithë janë grumbulluar në stacionin e trenit për të pritur regjistrimin e më pas hipjen në tren. Pasi Hungaria vendosi një mur të gjatë për të mbrojtur shtetin nga emigrantët, tani refugjatët do të gjejnë një alternativë tjetër me gjasë do të marrin rrugën për në Kroaci.
/tesheshi.com/
