Përshkallëzohen më tej marrëdhëniet e acaruara mes Tiranës dhe Athinës. Pas replikave të ashpra të një dite më parë, Ministria e Jashtme geke ka sulmuar sërish sot Tiranën, duke synuar të bëjë çështje një ngjarje në oborrin e Kishës së Dhërmiut.
Pikërisht pas kërkesës së Ministrisë së Jashtme Shqiptare që i kërkoi Athinës që të mos ndërhyjë për çështjet e ortodoksëve shqiptarë, qeveria helene ka ngritur zërin edhe më shumë. “Inkurajuese është ajo çfarë deklaroi dje përfaqësuesi i ministrisë së Jashtme shqiptare në lidhje me angazhimin e saj për të respektuar dhe mbrojtur të drejtat civile, të besimit dhe të pronës së minoritetit në Shqipëri. Greqia, siç e ka bërë deri sot, është në anën e Shqipërisë në rrugëtimin e saj drejt BE-së me kusht që Shqipëria të plotësojë të gjitha detyrimet sipas ligjeve ndërkombëtare.
Kjo, për më tepër, është dhe arsyeja pse ministria e Jashtme po pret një përgjigje dhe reagim të menjëhershëm nga qeveria shqiptare në atë që po ndodh në kishën e Shën Athanasit në Drimadhë të Himarës” thuhet në deklaratën e Ministrisë së Jashtme Greke.
Një ditë më parë Ministria e punëve të Jashtëme nëpërmjet zëdhënsit të sa Glevin Dervishi e ka cilësuar deklaratën e Greqisë të nxituar dhe pa asnjë bazë reale. Kurse këshilltari i Kryeministrit Artan Shkreli ka qenë më i ashpër. Në një interviste televizive, Shkreli e akuzoi Greqinë se synon të asgjësojë historinë shqiptare.
“Çështja është që këtu nuk kemi të bëjmë me palë sepse palët në një mënyrë apo në një tjetër përfaqësojnë forca të një raporti të themi të barabartë, por këtu flitet për një moskokëçarje, mos njohje dhe injorancë të klerit vendas në rastin konkret të Dhërmiut për rëndësinë historike që paraqet një godinë e vogël, e cila ka shërbyer në shekuj si Kisha e Shën Thanasit, ku ndër të tjera është varrosur dhe pararilindasi Nil Katalano, njeriu i cili bashkë me misionarë të tjerë kanë hapur shkollat shqipe në rajonet e Dhërmiut.
Himarës e malet e labërisë në shekujt 16-17 edhe më vonë dhe kanë mbajtur gjallë frymen e identitetit shqiptar në ato treva që në atë kohë ishin shumë të trazuara. Bëhej fjalë për hapjen e një serie seminaresh të cilat kishin natyrë liturgjike dhe të cilat jo vetëm që flitej shqip, por u furnizuan me literaturë shqipe dhe po themi që përveç shkollave të veriut të shqipërisë që ne i dimë shumë mirë në zonat e Kurbinit dhe të Mirditës këto ishin shkollat e para shqipe që u hapën në territoret shqiptare”, tha Shkreli për A1 Report.
/tesheshi.com/
