Ledia Canga: Pianistja me medalje të artë në Financë-Kontabilitet, që la gojëhapur Ilir Metën me “shokë”

Nga Bardha Nergjoni

Çfarë mund të mendoni për një vajzë që pasi studion 12 vjet piano, shkon e i futet financave duke përfunduar studimet me medalje ari?! Por mbi të gjitha, ka dhe një oratori, ose ndryshe një gojëtari që vërtet të le pa gojë?!

Më e pakta gjë është që ajo qenka një vajzë prej floriri, meqë pranë saj u ndodh dhe Ilir Meta.

Kjo është Ledia Canga, studentja e degës Financë – Kontabilitet në Universitetin “Aleksandër Xhuvani” në Elbasan, e cila përfundoi me të gjitha 10-ta dhe që për këtë arritje morri dhe një medalje ari.

Në ceremoninë e diplomimit i la të gjithë me gojëhapur për zhdërvjelltësinë në të folur, fjalët e përzgjedhura, tonin e vendosur dhe mesazhet që përcolli, aq sa dhe zyrtarë e pushtetarë të ndodhur aty e patën zili.

Ishte pra dhe Ilir Meta që ëndërroi ta kishte në LSI, gjykuar kjo nga mënyra se si e vështronte vajzën gjeniale, por ajo e përjashtoi veten nga angazhimet në…jo LSI por politikë.

Në një intervistë për tesheshi.com ajo tregon për veten dhe objektivat për të ardhmen…

Sa e vështirë ka qenë arritja e këtyre rezultateve duke pasur parasysh që vini nga një shkollë e profilizuar artistike?

Arritja e rezultateve të tilla ka qenë shumë e vështirë, e lodhshme por gjithashtu edhe e bukur. Është e vërtetë që shkollën e mesme e kam përfunduar në një profil të ndryshëm me studimet universitare, siç shkolla e muzikës. Jam pianiste prej 12 vitesh dhe vij nga shkolla e mesme artistike “Onufri”.

Ndoshta ju e keni pasur më të vështirë të arrini këto rezultate, por të qenurit sistematike dhe e angazhuar në piano mendoni se ka edhe një ndikim pozitiv në rrugëtimin universitar?

Nuk mund të them që piano më ka ndihmuar shumë në studimet e larta, pavarësisht se sipas studimeve të kohëve të fundit ka një lidhje shumë të theksuar midis muzikës dhe matematikës. Megjithatë unë do të veçoja që ajo që me të vërtetë mua më ndihmoi ishte moslënia pas dore e kurrikulave apo mësimeve si matematika, kimia apo lëndë të tjera ekzakte, të cilat nuk kanë shumë vend në shkollën e muzikës.

Nuk kam pasur kohë të bëj kurse private, por vetë dëshira për të studiuar bën të mundur çdo gjë.

Financë-Kontabilitet konsiderohet ndër degët më të vështira të fakultetit ekonomik. Si e zgjodhët këtë profil?

Ishte një vendim i një momenti të caktuar. Mbaj mend që po bëhesha gati për të konkuruar në Akademinë e Arteve, sot Universiteti i Arteve; por duke parë profilet se çfarë realisht kërkon tregu i punës, duke parë dhe përfitimet e mia në të ardhmen në aspektin arsimor, vendosa të kaloj nga bota e muzikës në botën e shifrave.

Jeni duke vazhduar studimet Master por ndërkohë e keni edhe një objektiv më afatgjatë?

Jam duke vazhduar Master Shkencor në Financë-Kontabilitet. Një ndër qëllimet më të afërta është diplomimi dhe më tej përmes dijes drejt të ardhmes.

Rezultatet por edhe oratoria bën që në ceremoninë e diplomimit të kishit edhe dy oferta punësimi. Si i vlerësoni?

Unë i falenderoj si kryetarin e Bashkisë e po ashtu Dekanin për vlerësimin dhe ofertat që më bënë. Jam studente e masterit dhe jam e përkushtuar tërësisht në studime tani për tani.

Gjatë fjalës tuaj u vu re edhe një lehtësi e të shprehur dhe aftësi komunikimi në publik. A bën pjesë në objektivat tuaja angazhimi në politikë?

Unë lexoj shumë dhe jo vetëm në fushën e studimeve në ekonomi por edhe në fusha të tjera. Besoj oratorinë e kam nga kjo. Për politikën, ajo nuk është në objektivat e mia. Pa dyshim që do të vazhdoj në Ekonomi.

Keni një mesazh të fundit?

Nuk do të isha sot këtu ku jam pa mbështetjen e prindërve dhe të vëllait tim. I falenderoj shumë. Janë forca ime kryesore.

/tesheshi.com/