Presidenti i ri i Këshillit Evropian, Antonio Costa, ka avokuar fuqishëm të premten për unitetin e Bashkimit Evropian dhe në të njëjtën kohë për ruajtjen e diversitetit të tij.
“Vetëm së bashku mund të sigurojmë stabilitet, siguri dhe paqe në kontinentin tonë”, tha Costa në ceremoninë e dorëzimit.
Ish-presidenti i Këshillit Evropian, liberali belg Charles Michel, i ka dorëzuar detyrën socialistit portugez Antonio Costa, i cili do të marrë zyrtarisht postin e presidentit të Këshillit Evropian të dielën e 1 dhjetorit. Michel i dorëzoi Costa-s zilen me të cilën Presidenti i Këshillit Evropian shënon fillimin e takimit në samitin e liderëve të shteteve anëtare.
“Vetëm së bashku mund të arrijmë që zëri i Evropës të dëgjohet në skenën ndërkombëtare, sepse uniteti është gjaku i Bashkimit Evropian, por ne nuk duhet t’i injorojmë dallimet tona të mendimeve ose t’i trajtojmë ato si problem”, tha Costa.
“Ky diversitet është krejtësisht i natyrshëm, ai na pasuron dhe përfaqëson forcën e Evropës,” tha Costa, i cili ka dëshmuar të jetë një politikan i aftë, duke ruajtur një ekuilibër delikat midis partnerëve të koalicionit dhe ka një reputacion si një ndërtues i suksesshëm konsensusi, një tipar i nevojshëm për postin e Presidentit të Këshillit Evropian.
Këshilli Evropian është organi më i rëndësishëm politik i BE-së, i cili mbledh krerët e shteteve ose qeverive, përcakton drejtimin strategjik dhe politikat e BE-së, të cilat merren me konsensus.
Detyra e Presidentit të Këshillit Evropian u prezantua me Traktatin e Lisbonës, i cili hyri në fuqi më 1 dhjetor 2009. Mandati i Presidentit të Këshillit Evropian zgjat dy vjet e gjysmë. Ai mund të rinovohet një herë, siç ka ndodhur me të gjithë presidentët e Këshillit Evropian deri më tani, ku të gjithë kanë shërbyer dy mandate, gjithsej pesë vjet, gjë që përkon me mandatin e Komisionit dhe Parlamentit Evropian.
Costa, një socialist 63-vjeçar, ishte kryeministër i Portugalisë nga viti 2015 deri në vitin 2024, ministër në disa qeveri, kryebashkiak i Lisbonës, anëtar i Parlamentit Evropian.
Costa u zgjodh President i Këshillit Evropian në qershor të këtij viti dhe para se të merrte detyrën vizitoi të gjitha kryeqytetet, përveç Bukureshtit dhe Sofjes, dhe bisedoi me liderët e vendeve anëtare.
“Ndihem i sigurt pasi kam folur me liderët evropianë gjatë javëve të fundit, të cilët kanë një ndjenjë urgjence dhe janë të fokusuar në veprimin kolektiv të frymëzuar nga kreativiteti dhe pragmatizmi”, tha Costa.
Lufta për vlerat evropiane
Costa theksoi në fjalën e tij se Bashkimi Evropian bazohet në vlerat, dinjitetin njerëzor, lirinë, sundimin e ligjit, demokracinë dhe barazinë dhe se qëllimi i tij është të sigurojë paqe dhe prosperitet.
Duke folur për luftën që ka mbi një mijë ditë që po vazhdon në tokën evropiane kur Rusia sulmoi Ukrainën, Costa tha se “ne të gjithë dëshirojmë paqen”.
“Por paqja nuk mund të nënkuptojë paqen e varrezave, nuk mund të nënkuptojë kapitullim, paqja nuk duhet të shpërblejë agresionin. Paqja në Ukrainë duhet të jetë e drejtë dhe e qëndrueshme dhe e bazuar në të drejtën ndërkombëtare, e cila përfshin të drejtën e popujve për vetëvendosje, të drejtën e popujve për të zgjedhur të ardhmen e tyre dhe respektimin e integritetit territorial dhe kufijve shtetërorë”, tha Costa.
Ai shtoi se BE-ja duhet të jetë më e fortë, më efikase, më elastike me më shumë autonomi në fushën e sigurisë dhe mbrojtjes, duke punuar vazhdimisht në partneritetin transatlantik.
Ai theksoi se zgjerimi në Ballkanin Perëndimor dhe fqinjët lindorë është “një mjet i fuqishëm për paqen, sigurinë dhe prosperitetin dhe një imperativ gjeopolitik”, duke theksuar se si BE ashtu edhe vendet kandidate duhet të punojnë më fort dhe më shpejt “pa afate artificiale, por edhe pa pengesa të panevojshme”.
Costa falënderoi presidentin në largim Charles Michel, duke thënë se “Evropa i detyrohet shumë atij”.
Pesë vitet e Michel në krye të Këshillit Evropian u shënuan nga marrëdhëniet e tensionuara dhe konkurrenca nga Presidentja e Komisionit Evropian Ursula von der Leyen. Michel e lë këtë pozicion me vlerësime shumë më të ulëta se paraardhësit e tij Herman Van Rompuy dhe Donald Tusk.
Costa është drejtuesi i parë i një institucioni europian që nuk është me origjinë europiane. Gjyshi i tij nga babai është nga shteti indian i Goa, i cili dikur ishte një koloni portugeze, dhe gjyshja e tij nga babai është me origjinë franceze-mozambike. Mozambiku ishte gjithashtu një koloni portugeze. Kosta ka të ashtuquajturën “shtetësi jashtë shtetit të Indisë”, e cila është një formë e qëndrimit të përhershëm dhe leje pune në Indi bazuar në origjinën indiane. /tesheshi.com/
