Mensur Krasniqi
Politologu dhe ideatori i Listës për Shqipërinë Natyrale, Koço Danaj, ka trazuar dhe provokuar edhe një herë Serbinë, Greqinë, Malin e Zi dhe Maqedoninë, shtete të cilat i përvetësuan trojet shqiptare falë Konferencës famëkeqe të Ambasadorëve, mbajtur në Londër në vitin 1913.
Gjatë një interviste, Koço Danaj ka deklaruar se e vetmja rrugë për paqen në rajon është shpërbërja e Maqedonisë dhe bashkimi i një pjesë të saj me Shqipërinë, siç ishte para vitit 1913. Danaj pohoi ndër të tjera se Konferenca e Londrës nuk është e ligjshme dhe nuk ekziston, ndërsa ka shtuar se pesë ambasadorë u mblodhën gjatë një pasditeje për të pirë çaj dhe e copëtuan Shqipërinë.
Ideatori i Listës për Shqipërinë Natyrale ka pohuar se ka ardhur koha për hedhjen poshtë të kësaj konference kriminale, e cila vendosi copëtimin e kombit shqiptar në pesë pjesë. Ai u shpreh se pas 100 vitesh kemi të bëjmë me dy shtete shqiptare, Shqipërinë dhe Kosovën, kemi të bëjmë me një gjysmë shteti shqiptar, në Maqedoni, me pakica shqiptare në Luginën e Preshevës dhe në Mal të Zi, kemi të bëjmë me një krahinë shqiptare, banorët e së cilës u dëbuan me gjenocid, e cila quhet Çamëri. Danaj shtoi se kufijtë e Shqipërisë janë nga Presheva në Prevezë, nga Durrësi në Shkup.
Ndërkaq, Danaj ka nisur edhe mbledhjen e firmave për shfuqizimin e Konferencës së Londrës, nismë e cila ka tërbuar Serbinë dhe Greqinë, ndërsa ka ndezur edhe mediat e Evropës.
I pyetur se çfarë e pengon Maqedoninë të integrohet në BE, Danaj ka deklaruar se çështja e emrit është vetëm një pretekst, e se nuk paraqet aq pengesë të madhe sa mosrespektimi i Marrëveshjes së Ohrit.
“Po të qe seriozisht problem çështja e emrit, për shembull, me krizën katastrofike greke do të ishte shumë e lehtë që kancelarja gjermane, Merkel, vetëm me një telefonatë që do t’i bënte kryeministrit grek për t’ia kushtëzuar marrjen e ndihmës prej miliarda eurosh me pranimin e emrit të Republikës së Maqedonisë, të jeni të sigurtë që gjithë grekët do ta pranonin kokulur, për 30 minuta, Maqedoninë me emrin që ka. Por zonja Merkel nuk e bën këtë. As SHBA-ja nuk e bën këtë,” thotë Danaj.
Sipas Danajt, as bashkësia ndërkombëtare nuk e di se ç’do të bëjë me këtë shtet. Sepse në këtë Maqedoni, sipas tij, ka vdekur ajo që e shpëtoi në 2001-in. “Ka vdekur marrëveshja e Ohrit. Marrëveshja e Ohrit ishte kompromisi më i madh që bënë shqiptarët, edhe nën ndikimin e trysnisë së ndërkombëtarëve, për të shpëtuar Maqedoninë. Ndërkaq, shovinizmi maqedonas e cilësoi të dyshimtë këtë marrëveshje, e ka hedhur poshtë. Kjo Maqedoni nuk mund të ekzistojë dot më kështu siç është. Qeveria e Gruevskit nuk pranon t’i konsiderojë shqiptarët të barabartë.” sqaron Danaj.
Për Danajn, shqiptarët që jetojnë në këtë shtet nuk llogariten si shqiptarë të Maqedonisë Perëndimore, por të Shqipërisë Lindore, pasi askush nuk ia njeh identitetin Maqedonisë.
“Shqiptarët e kanë trungun e tyre. Shqiptarët e kanë vendin e tyre. Shqiptarët nuk janë pjesë e Maqedonisë Perëndimore, shqiptarët janë pjesë e Shqipërisë Lindore. Bullgaria nuk i njeh Maqedonisë identitetin, Greqia nuk i njeh emrin, Serbia nuk i njeh Kishën. Përjashto Shqipërinë, e cila gjithmonë, me altruizëm politik të neveritshëm, absurd, ia njohu të gjitha të drejtat Maqedonisë. Në këto kushte, ka vetëm një rrugë: Maqedonia stabilizohet kur shqiptarët të shkëputen e të bashkohen me Shqipërinë,” përfundon Danaj. /tesheshi.com/
