Prej më shumë se një viti Ilir Meta dhe Tom Doshi janë në një luftë pa kthim me njëri-tjetrin dhe secili i ka bërë “be-në” kundërshtarit që ta “vrasë” politikisht.
Por pak e dinë, se Tom Doshi ka hyrë në “analet” e lidhjes me politikën shqiptare pikërisht nga Ilir Meta, kur ky i fundit ishte Kryeministër.
Pas një aksioni biznesi përtej oqeanit në Australi por edhe në Shkodër, Tom Doshi i futet biznesit të madh, duke privatizuar fabrikën e qumshtit që dikur ishte pronë e shtetit. Këtë operacion e kryen me bashkëpunimin e Hasanbellinjve të Durrësit, ortakë të Doshit dhe me lidhje të afërta me Kryeministrin Ilir Meta dhe deputetin durrsak me origjinë nga Skrapari, Spartak Braho.
Më pas, Tom Doshi bëhet i njohur në rangjet e larta të Tiranës me një operacion të fuqishëm biznesi: blen entin më të fuqishëm prodhues shtetëror: fabrikën e barnave “Profarma”.
Ky stabiliment prodhon ilaçet dhe aksesorët medicinale kryesore (serume, ujë fiziologjik etj) që konsumojnë spitalet dhe poliklinikat shtetërore.
Në vitin 2001, një biznesmen i njohur italian, që zotëronte shoqërinë “Prodentalfarma”, akuzoi Kryeministrin Ilir Meta në atë kohë se po e sulmon padrejtësisht për të favorizuar Doshin.
Bashkëpunimi Meta-Doshi vazhdoi edhe pas largimit nga qeveria dhe ardhjes së Nanos-Kryeministër.
Tom Doshi me Nanon lidh marrëdhënie të ngushta dhe kreu i PS-së e bën deputet të Shkodrës, pasi e refuzon Berisha.
Ndërkaq pas daljes së PS-së në opozitë, në vitin 2005 deri në vitin 2006 Tom Doshi ishte njeriu që negocioi fuqishëm për të bashkuar Ramën dhe Metën, të cilët u takuan për koalicionin e vitit 2007, pikërisht në një drekë të ftuar dhe shtruar nga deputeti Tom Doshi.
Madje në seancën e famshme të verës së vitit 2006, kur Ilir Meta “pushtoi” tribunën e Kuvendit duke hedhur vazot e luleve mbi Jozefina Topallin, një nga deputetët që e ndihmuan me muskuj ishte pikërisht Tom Doshi.
Marrëdhëniet kanë qenë të mira, deri në ditën kur Dritan Prifti nisi të punojë për vete dhe të mos i japë llogari shefit të vet, kur ishte Ministër i Energjitikës. Pas kësaj plasi videoja dhe videot e tjera që ne i njohim mirë dhe shumë mirë…./tesheshi.com/
