Presidentja e Komisionit Europian, Ursula Von der Leyen ka postuar në faqen e vet në Instagram një letër të shkruar nga Erjola, një 16-vjeçare nga Kurbini, nga e cila falenderohet për rindërtimin e shkollës së saj të shkatërruar nga tërmeti i 26 nëntorit.
“Kjo letër më preku. Nuk është vetëm një rrëfim thellësisht personal i përvojës së saj.
Është gjithashtu një kujtesë e fuqishme e të mirave që mund të arrijmë si evropianë kur punojmë së bashku. Në këtë rast BE-ja dhe Shqipëria”, shkruan Von der Leyen.
Më pas, zyrtarja e lartë e Brukselit potencon angazhimin e Brukselit pasi Shqipëria u godit nga tërmeti 6,4 i shkallës Rihter që la pas viktima dhe shkatërrim.
“I gjithë Bashkimi Evropian u mobilizua me shpejtësi për një vend që është në zemër të kontinentit tonë dhe që shpresoj dhe jam i bindur se një ditë do të jetë gjithashtu pjesë e Bashkimit tonë. Të njëjtën shpresë shpreh edhe Erjola në letrën e saj. ‘Sot unë, miqtë e mi ndihemi europianë të vërtetë’, shkruan ajo”, lexohet në postimin e Von der Leyen.
Kujtojmë se gjatë një vizite pak kohë më parë në Shqipëri, Von der Leyen përuroi shkollën një shkollë dhe një kopësht në Krujë, të rindërtuara me fondet e BE-së. /tesheshi.com/
