Me ndeshjen mes Mançester Sitit dhe Realit të Madridit, që do të zhvillohet sonte, nisin dhe sfidat gjysmëfinale të Champions League-s.
Anglezët janë për herë të parë në një fazë të tillë të aktivitetit më me prestigj të futbollit në Europë. Për ta ky është një sukses më vete, edhe pse do të kërkojnë të shkojnë në finale.
Dy ekipet janë përballur në fazën në grupe të kësaj veprimtarie në sezonin 2012-2013. Madrilenët patën fituar 3-2 në fushën e tyre, për të barazuar 1-1 në ndeshjen pasardhëse në “Etihad Stadium”.
Për Mançesterin do të mungojë një element i rëndësishëm, Yaya Toure, i lënduar në fundjavë, që është në dyshim dhe për ndeshjen e kthimit. Vincent Kompany është i gatshëm për të luajtur, e po ashtu do të kthehet dhe belgu Kevin de Bruyne.
Trajneri Pellegrini, që më herët e ka drejtuar dhe Realin e Madridit, u ka bërë thirrje lojtarëve të tij që t’i kontrollojnë emocionet.
“Eshtë shumë e rëndësishme emocionalisht të kesh një zemër të nxehtë, por një mendje të ftohtë. Eshtë e rëndësishme të mos jesh emocional.”
Në anën tjetër, Reali i Madridit ka një histori suksesi në këtë aktivitet. Madrilenët kanë arritur në gjysmëfinale të Champions League-s në gjashtë sezonet e shkuara, teksa provojnë tani të fitojnë me një drejtues të ri teknik në stol, me francezin Zinedine Zidane.
Ronaldo dhe Benzema shpresohet të jenë në fushë sonte. Portugezi nuk luajti fare në ndeshjen ndaj Valekanos në kampionat, e Benzema e la fushën në fund të pjesës së parë i dëmtuar. Por të dy lojtarët janë të gatshëm për këtë takim.
“Gjysmëfinalet nuk janë një festë. Ju mund të përgatiteni mirë dhe mandej të përballeni me një ndeshje krejt të ndryshme nga ajo që prisnit. Por ne kemi dy ndeshje, vetëm njëra nga të cilët është nesër (sot), ku duhet të japim gjithçka kundër një kundërshtari të vështirë.”
Pas këtyre fjalëve, Zinedine Zidane deklaron se i sheh të barabarta për të dy ekipet mundësitë për të shkuar në finale. /tesheshi.com/
