Me gjasë nga padija, fjalia e fundit e një urimi kortezial të Presidentit Begaj me rastin e Fiter Bajramit, përbën në thelb një fyerje për muslimanët, por nga padija.
“Zoti ju bekoftë dhe ju udhëzoftë në rrugën e drejtë!”, e përfundon urimin e tij kreu i shtetit, drejtuar muslimanëve, ku kleçka qëndron te pjesa “ju udhëzoftë në rrugën e drejtë”.
Fetarisht, muslimanët janë të udhëzuar automatikisht e logjikisht në rrugën e drejtë që në të qënit muslimanë, pra ndjekës dhe praktikues të Islamit. Kjo pasi Islami konsiderohet feja e Zotit, e vetmja dhe e përplota, e përsosura në çdo detaj, zbritur nga Zoti për njerëzimin. Ndaj, kush është jashtë Islamit konsiderohet “jo në rrugë të drejtë”, pra “jo i udhëzuar”, ku mund t’i urohet të “udhëzohet” për të qenë në “rrugë të drejtë”, siç Presidenti Begaj jua uron këtë muslimanëve. Gjithashtu, të qënit musliman konsiderohet të qënit natyrshëm “i udhëzuar”, pra në “rrugë të drejtë”, pasi në thelbin e tij, në natyshmërinë e tij, njeriu lind musliman – me besim të pastër – por që rrethana jetësore mund ta devijojnë.
Nga ana tjetër, lloji i urimit të Presidentit Begaj, te muslimanët ekziston për çdokënd që është jashtë Islamit, që është në udhë të gabuar.
Në këtë kontekst, u takon muslimanëve ta urojnë Presidentit Begaj që Zoti ta udhëzojë në rrugën e drejtë” e jo e kundërta, gjersa ai është musliman në trashëgimi, por nuk bën jetë fetare. Tejet dashamirësisht, nga çdo musliman, për kreun e shtetit e çdo shtetar pa islam në udhërrëfimin jetësor, shkon urimi në këtë ditë të madhe: “Zoti ju udhëzoftë në rrugë të drejtë!”. /tesheshi.com/
