Ndërsa prokuroria ka nisur arrestimin e një dyzine zyrtarësh për korrupsion Parlamenti ka ngritur komisionin e posaçëm për të reformuar drejtësinë shqiptare. Një burim diplomatic i tha tesheshi.com se komisioni i ngritur nga Parlamenti do të punojë me “material të gatshëm”. Më konkretisht Komisioni i Venevias pritet të sjellë javën e ardhshme një draft paraprak, i cili më pas do të diskutohet nga të gjithë grupet e interest në vend.
Siç mësohet ky draft do të përcaktojë ndryshimin thelbësor të pozicionit të KLD-së, krerëve të gjykatave si dhe Prokurorisë së Përgjithshme. Siç bëhet e ditur nga burimi dipomatik, rekomandimi ndërkombëtar është që “gjithçka të nsië nga zero” pra me miratimin e ligjit në Kuvend e gjithë KLD, Prokurori i përgjithshëm dhe krerët e dy gjykatave do të rinovohen plotësisht. Vetë Gjykata Kushtetuese nuk do ta pësojë nga kjo reformë. Ambasadorja e Bashkimit Europian në Tiranë, Romana Vllahutin, ka deklaruar se duhet të ndryshojë kushtetuta, gjë që bëhet për riformulimin e Prokurorisë dhe Gjykatës së Lartë.
Nërkaq, Parlamenti shqiptar ka ngritur sot Komisionin e Reformës në Drejtësi, i cili përbëhet nga ish-kryeministra dhe ish-ministra që kanë qenë pjesë e sistemit për vite me radhë.
Kuvendi e mori vendimin për ngritjen e komisionit me 93 vota ku palët përfaqësohen me numër të barabartë anëtarësh.
Pesë anëtarët e mazhorancës në këtë komision janë Fatmir Xhafaj, njëkohësisht edhe kryetar i komisionit, Vasilika Hysi, Pandeli Majko, Ulsi Manja dhe Spartak Braho. Ndërsa opozita do të përfaqësohet nga Eduart Halimi, Oerd Bylykbashi, Arben Ristani, Gent Strazimiri dhe Fatmir Mediu.
Ngritja e këtij komisioni mbërrin pas marrëveshjes së arritur në fillim të javës mes mazhorancës dhe opozitës, një marrëveshja e gjetur edhe me ndërhyrjen e fortë të ndërkombëtarëve, që kohët e fundit kanë shpeshtuar thirrjet për këtë reformë, duke e cilësuar si vendimtare në çeljen e negociatave të anëtarësimit të vendit tonë në BE.
Në punimet e këtij komisioni nuk parashikohet e drejta e vetos për opozitën, siç kërkonte ajo disa muaj më parë, por do të ushtrohet parimi i paritetit.
Megjithatë, mazhoranca ka ruajtur epërsinë e votave nëpërmjet ushtrimit të fuqisë së votës së dyfishtë të kryetarit, i cili ka rënë dakord të mos e përdorë në disa raste të veçanta, të kërkuara edhe më herët nga opozita dhe që kanë të bëjnë kryesisht me ekspertizën e ligjeve.
“Përjashtimisht në rastet kur rezultati është i barabartë, vota e kryetarit të komisionit është vendimtare, duke respektuar në çdo vendimarrje standardet ndërkombëtare të transparencës dhe gjithëpërfshirjes në kosultim me ekspertizën ndërkombëtare, përfshirë edhe Komisionin e Venecias”, tha Xhafaj.
“Duke pasur parasysh që procesi të përputhet me standardet europiane, kryetari nuk do të përdorë votën e dyfishtë. Pra, do të ketë një respektim të padiskutueshëm të këtyre standardeve. Për këtë ne kemi rënë dakord”, u shpreh Halimi.
/tesheshi.com/
