Nga Mensur Krasniqi
Në axhendën e takimeve me qytetarë, kryetari i opozitës maqedonase të LSDM-së, Zoran Zaev, vizitoi edhe Tetovën, qytetin me më së shumti banorë shqiptarë në Maqedoni.
Në luftë për një Maqedoni më të mirë siç thotë Zoran Zaev, iu nevojitet përkrahje e qytetarëve, së bashku të udhëheqin, për të mirën e të gjithëve dhe jo për interesa personale.
Ai akuzoi autoritetet qeveritare për neglizhencë në moszgjidhjes së problemeve elementare për ekzistencë të qytetarëve, siç janë uji pijshëm, ambienti i ndotur dhe infrastruktura katastrofale. Sipas tij, zgjidhja e këtyre problemeve nuk kap shumën, e as të dy përmendoreve nga projekti i “Shkupit 2014”.
“Jemi shekulli XXI, ndërsa qytetarët e Tetovës ballafaqohen me probleme të mungesës së ujit. Nuk është vetëm kjo, ndotje e madhe e ajrit, infrastrukturë e keqe, kaos urbanistik dhe në komunikacion, mungesa e fushave sportive, deponitë.
Një numër i madh i këtyre problemeve do të zgjidheshin, nëse sot do kishim dy përmendore më pak”, iu drejtua në këtë formë Zoran Zaev qytetarëve të Tetovës.
Zaev foli edhe për kthimin e partisë së tij në Kuvend, duke premtuar se do jenë aktiv duke luftuar për të drejtat e qytetarëve.
“A i shikuat deputetët se si luftojnë për qytetarët, dhe do të vazhdojnë të luftojnë. Çdo të tretën javë do të propozojmë ligje serioze për një jetë më të mirë të qytetarëve. E di që edhe kur do të fitojmë mbi Nikolla Gruevskin do na hapen probleme të reja për shkak të ekonomisë së dështuar dhe borxhit të madh.
Të jemi të bashkuar si popull, këtë sfidë së bashku ta kalojmë. Unë jam i gatshëm ta kaloj së bashku me juve në të mirë të përgjithshme”, tha Zaev.
Ndërkaq, rinia e Tetovës ja bëri me dije Zoran Zaevit që janë të gatshëm ta përkrahin atë duke parë hapat e guximshme që ka marrë partia e tij në rikthimin e lirisë, demokracisë dhe të drejtat e gjithë qytetarëve. /tesheshi.com/
