Nga Blendi Gashi
Kombëtarja jonë, Shqipëria, është shumë afër të shkruajë historinë. Pika e artë e marr të premten mbrëma në duel me Danimarkën, shihet si një hap drejt realizimit të ëndrrës së kahmnotshme, kualifikimit në një Kampionat Evropian të futbollit.
Trajnerët e skuadra kosovare mendojnë se asnjëherë më parë kombëtarja shqiptare nuk ka qenë më afër se direkt të sigurojë ëndrrën e shumëpritur me dekada.
Të hënën në mbrëmje, kombëtarja që udhëhiqet nga trajneri Gianni De Biasi para vetës ka një sfidë të madhe, duelin me liderin e Grupit, kombëtaren e Portugalisë që udhëhiqet nga ylli i tyre Cristiano Ronaldo.
Sipas trajnerëve arkëtimi i ndonjë pike edhe ndaj portugezëve do të ishte hap vendimtar në kualifikimin e Shqipërisë në ‘Francë 2016’, pasi mundësia është reale që të fitohen pikë edhe ndaj Serbisë dhe Armenisë.
Arbnor Morina, trajner i klubit futbollistik, Besa nga Peja, në një prononcim për portalin “Te Sheshi”, ka thënë se rezultati me danezët është i merituar.
Ai thotë se në sfidën ndaj portugezëve duhet të synohet hapi tjetër që të inkasohen pikë dhe të jemi më afër ëndrrës të të gjithëve.
“Mendoj se kombëtarja në Elbasan ka shansin ta bëj hapin vendimtar sepse kemi edhe dy kundërshtar tjerë mandej dhe kemi mundësi reale të marrim pikë edhe në ato takime. Jemi shumë afër realizimit të asaj që po e presim me dekada”, shprehet Morina.
Trajneri i disa skuadrave kosovare, Afrim Toverlani, thotë për ‘Te Sheshi’, se Shqipëria kurrë nuk ka pasur gjasa më të mira për kualifim direkt.
“Mendimi im është se në bazë të lojës që u zhvillua me Danimarkën dhe rasti që na u dha në fund të lojës është dashur të shfrytëzohet për asist dhe do realizohej goli i fitores së madhe. Jo pse nuk jemi të kënaqur me barazimin por në futboll duhet të shfrytëzohet mundësia dhe rasti kur te jepet. Sa i përket Portugalisë me rëndësi është mos ëe humbim sepse Serbia dhe Armenia realisht janë më të dobëta dhe aty duhet kërkuar fitoren për kualifikim”, pohon Tovërlani.
Tahir Lushtaku, ish trajner i Drenicës, beson se kombëtarja jonë pas pikës së artë të fituar ndaj Danimarkës, 99% i ka gjasat në durat e veta për kualifkim dhe shprehet optimist se do të jetë e pranishme në Francë.
“Besoj që edhe Portugalia ka gjasa që së bashku me Shqipërinë do jenë në Evropian. Edhe pse Potugalia nuk ka treguar futboll të mirë kur dihet fuqia e kësaj Kombëtare por e ka edhe përvojën dhe do të luajë një rol të rëndësishëm në ndeshjet e fundit”, thotë Lushtaku për “Te Sheshi”.
Futbollisti i klubit Hajvalia, njëherit menaxheri Shpëtim Babaj, i cili ka dërguar shumë futbollistë kosovarë në Shqipëri ka theksuar për “Te Sheshi” se gjasat janë maksimale për kualifikim në Francë edhe pse ka akoma punë. Ai vlerëson shumë punën e trajnerit italian Gianni De Biasi, për të cilin thotë se ka bërë një punë shumë të mire.
“Me Portugalinë shpresojm në një rezultat pozitiv ku do ta kemi mbështetjen maksimale nga tifozët tanë. I vetmi hendikep i yni është sepse shumë lojtar të kombëtares kanë gjetur vonë ekipe dhe nuk janë akoma në formën më të mirë të tyre”, thotë Babaj.
Ndryshe, Shqipëria zë vendin e tretë në tabelë me 11 pikë të mbledhura, aq sa ka edhe Danimarka dhe një pikë se lideri Portugalia.
Para vetës ka edhe tre ndeshje. Të hënën do të takohet me Portugalinë, më pas me Serbinë dhe në fund Armeninë, nga të cilat takime përfundimisht duhet të nxjerrë pike për të bërë realitet ëndrrën shumëvjeçare shqiptare. /tesheshi.com/
