Danny Welbeck, sulmuesi i Arsenalit në Premier League, do të qëndrojë për muaj të tërë jashtë fushave të futbollit, duke mos humbur vetëm Euro 2016-tën, por edhe një pjesë të mirë të sezonit pasues.
Ai u detyrua ta linte lojën që në mesin e pjesës së parë këtë të dielë, në takimin e Arsenalit ndaj Mançester Sitit, pas një përplasjeje me Bacary Sagna-n.
I ardhur nga Mançester Junajtedi dy vite më parë, Welbeck nuk ia ka dalë për asnjë çast të jetë përcaktuar për topçinjtë.
Në këtë sezon ai ka bërë 11 paraqitje me klubin e tij, por asnjëherë nuk ka luajtur për 90 minuta të plota. Vetëm katër janë golat e shënuar prej tij në 37 ndeshje të kampionatit. Welbeck njihet si një lojtar me dëmtime të shumta gjatë karrierës.
“Do të kthehem më i fortë.” Ky ka qenë reagimi i Welbeck-ut pasi ka mësuar lajmin për dëmtimin e rëndë në gjurin e djathtë.
Ai pritej të ishte pjesë e kombëtares angleze në Europianin e Francës. Gjashtë golat e tij në pesë prej ndeshjeve kualifikuese të Anglisë e kishin bërë atë një të parapëlqyer për trajnerin Hodgson.
Welbeck i bashkohet kështu shokut të skuadrës te Arsenali, Oxlade-Chamberlain-it, që gjithashtu do të mungojë në kombëtaren angleze në aventurën në Francë po për shkak të një dëmtimi. /tesheshi.com/
