Studentët dhe pedagogët në Shqipëri do të fillojnë vitin e ri akademik jo me ligjin e ri që sapo u miratua nga Parlamenti, por me ligjin ekzistues.
Kjo pasi ligji, i cili mori 78 vota në Kuvend seancën e së martës, thekson se Institucionet e Arsimit të Lartë të Pavarur ngrihen jo më herët se viti akademik 2017-2018.
Brenda nëntë muajve nga hyrja në fuqi e këtij ligji, Ministria e Arsimit do të miratojë dhe bëjë publike listën e institucioneve të arsimit të lartë që plotësojnë kriteret për dhënien e titujve akademikë.
Pra, asnjë alarm. I gjithë ky, është një proces i cili do të nisë vetëm kur mbaron mandati i institucioneve aktuale, përkatësisht rektorateve dhe senateve të Universiteteve shqiptare.
Edhe pse në Kuvend pati polemika të forta në lidhje me ligjin ato nuk kanë reshtur as pas miratimit të tij në Kuvend.
Lideri i opozitës, Lulzim basha, deklaroi se PD do të marrë nismë ligjore për ta dërguar ligjin në Gjykatën Kushtetuese, ku do të kërkojë shfuqizimin e tij.
“Ne do të marrim një aksion të gjerë informimi dhe ndërgjegjësimi të çdokujt, sesi hidhen në kosh të plehrave përpjekjet e mijëra gjimnazistëve? Si goditen të zotët, të aftët? Si stimulohen të paaftët? Çfarë do të thotë kjo për studentët? Një fushatë ndërgjegjësuese që nis sot e do të vazhdojë. Së dyti Partia Demokratike do të ndërmarrë një aksion masiv institucional, që nga Presidenti e deri tek Gjykata Kushtetuese, ku opozita do të jetë në krah të studentëve dhe pedagogëve që kanë të drejtë”, tha Basha.
Ndërkaq, nga ana tjetër, kryeministri Edi Rama, në një dalje publike të posaçme, tha se ligji për Arsimin e Lartë është gjithëpërfshirës dhe me standarde perëndimore.
“Produkti është shumë i mirë dhe është për të ardhur keq kundërshtia që bëhet në emër të të varfërve, duke spekuluar në mënyrën më të padenjë dhe duke gënjyer në mëyrën më të papranueshme. Ligji garanton konkurrencë dhe që asnjë i ri apo e re, që ka dëshirë të ndjekë universitetin dhe që e meriton, të mos pengohet nga varfëria në familje, sepse është shteti që do të mbështesë të gjithë fëmijët e shtresës së varfër për të kryer me sukses përfundimet ku ata dëshirojnë”, tha Rama.
/tesheshi.com/
