Nga Blendi Gashi
Korrupsioni dhe krimi i organizuar vazhdojën të jenë sfidat kryesore të institucioneve të Kosovës, sfida që figurojnë në çdo raport ndërkombëtar dhe vendor, derisa lufta kundër kësaj dukurie vazhdon të jetë kryesisht vetëm verbale, si nga zyrtarët më të lartë të vendit ashtu edhe nga institucionet dhe asociacionet e ndryshme, të deklaruara për luftimin e korrupsionit.
Më shumë se tre vjet pas krijimit me pompozitet medial të Këshillit Kombëtar Kundër Korrupsion nga presidentja e Kosovës, Atifete Jahjaga, pothuajse asgjë nuk është bërë për të luftuarkëto dukuri negative që po e ‘hajnë’, shtetin.
Ekspertë të sigurisë thonë se këshilli anti-korrupsion i formuar nga Jahjaga dhe Agjencia anti-korrupsion e udhëhequr nga Hasan Preteni, më shumë janë formuar për qejfin e ndërkombëtarëve, sa për të thënë kinse po luftohet krimi dhe korrupsioni.
Portali “Te Sheshi”, ka vendosur të rikujtoi për lexuesit se çfarë kishte thënë presidentja Jahjaga në mbledhjen inauguruese të Këshillit anti-korrupsion të mbajtur më 15 shkurt 2012.
“Qëllimi i Këshillit do të jetë të ndërtojë politika për luftimin efikas të korrupsionit. Qytetarët presin që plotësisht ta realizojmë parimin askush mbi ligjin. Zero Tolerancë ndaj Korrupsionit dhe Krimit të Organizuar. Qytetarët presin që t’i realizojnë të drejtat dhe liritë e tyre pa pasur nevojë të paguajnë, pa pasur nevojë të japin mito, të korruptojnë, dhe pa pasur nevojë që të mirat qe ju takojnë t’i ndajnë me parazitët që ju thithin djersën dhe mundin e punës si qytetarë të devotshëm të vendit tonë”, kishte deklaruara Jahjaga.
Por çfarë ka ndryshuar për mirë tre vite pas?
Ka apo jo rezultate në luftën anti-korrupsion dhe anti-krim?
Pothuajse, asgjë. Risi mund të jetë që me ndërrimin e pushteteve janë ndërruar edhe anëtarët e Këshillit, po ashtu edhe ndonjë ambasador.
Kur u themelua në Këshill ishin Hashim Thaçi (kryeministër), Jakup Krasniqi (kryekuvendar), Bajram Rexhepi (Ministër i Brendshëm). Tani në vend të tyre janë Isa Mustafa (kryeministër), Kadri Veseli (kryekuvendar), Skënder Hyseni (Ministër i Brendshëm).
Tre vite pas, Jahjaga vazhdon pothuajse në çdo takim të përsërit fjalën e njëjta, shprehet se ‘duhet’, luftuar korrupsionin. Por, deklarata të tilla nuk mjaftojnë.
Rezultatet flasin vetë. Korrupsioni vetëm sa është rritur, paoshtu edhe krimi i organizuar derisa institucionet e vendit vazhdojnë të jenë në ‘gjumë’ të thellë, kurse fjalimet e Jahjagës, Mustafës, Veselit apo Hysenit, nuk po çojnë peshë.
Se gjithçka po mbetet vetëm në kuadër të fjalëve të kota, ka treguar edhe fjala e presidentes Jahjaga bërë në mbledhjen e mbajtur dje (25 shtator 2015), se rruga e Kosovës drejt luftimit të korrupsionit është e gjatë, por që nuk ka alternativë tjetër dhe duhet luftuar. Pra, sërish ka thënë ‘duhet luftuar’, duke pranuar kështu se nuk është arritur asnjë rezultat në luftën anti-korrupsuin dhe anti-krim.
Njëjtë si Jahjaga, edhe kryeministri Isa Mustafa, në mbledhjen e mbajtur dje ka thënë se duhet luftuar korrupsioni si në institucione edhe në agjenci të pavarura që të zhduket kjo dukuri.
Se korrupsioni duhet luftuar në të gjitha institucionet, këtë gjë të gjithë e dijnë, por kryeministri Mustafa duhet të jap të dhëna të sakta se çfarë ka bërë qeverisja e tij për luftuar këtë dukuri negative.
Ambasadori i SHBA-ve, Greg Delawie, theksoi në fjalën e tij një konstatim të sondazheve se qytetarët e shohin korrupsionin si pengesën kryesore.
“Lufta ndaj korrupsionit kërkon shumë përpjekje”, tha ai duke shprehur gatishmërinë e Amerikës për të ndihmuar Kosovën në këtë betejë.
Eksperti i sigurisë, Avni Islami, në një pronocim për portalin ‘Te Sheshi’, thotë se mjaftojnë mekanizmat e sigurisë dhe ligjet ekzistuese që të luftohet krimi dhe korrupsioni.
“Këshilli Kundër Korrupsion i formuar nga presidenta Jahjaga por edhe Agjencia Kundër Korrupsion e drejtuar nga Hasan Preteni janë themeluar më tepër për të rënë në sy para Bashkësisë ndërkombëtare kinse po bëjnë përpjekeje për të luftuar krimin dhe korrupsionin. Statistikat janë duke treguar gjithnjë se rastet e tilla korruptive janë në rritje”, ka deklaruar Islami.
Korrupsioni, krimi i organizuar, shkeljet e vazhdueshme të ligjit, vrasjet për fajde janë ndër probleme që ndodhin çdo ditë në Kosovë, derisa institucionet gjegjëse pothujasve kanë dështuar në tërësi që t’i thonë një here e mire STOP këtyre dukurive dhe të gjithë përgjegjësit t’i vëjnë para organeve të drejtësisë.
Ndryshe, Këshilli Kombëtar Kundër Korrupsionit është themeluar nga presidentja e Kosovës, me dekret të veçantë, duke përcaktuar edhe anëtarët, edhe qëllimet edhe mënyrën e punës.
Funksionet e Këshillit:
Të koordinojë aktivitetet në parandalimin dhe luftimin e korrupsionit.
Të identifikojë dhe të koordinoj aktivitetet në përkrahje të zbatimit të strategjisë kombëtare në luftimin e korrupsionit.
Të përcaktoj prioritetet dhe politikat për zbatimin e agjendës legjislative në ngritjen e efektivitetit në luftën kundër korrupsion.
Të koordinoj punën e aktivitetet e institucioneve përgjegjëse në forcimin e mekanizmave ekzistues për luftimin e korrupsionit.
Të rrisë vetëdijen e shoqërisë për parandalimin dhe luftimin e korrupsionit. /tesheshi.com/
