Në mbledhjen e grupit parlamentar të thirrur sot nga Edi Rama në rolin e kryetarit të Partisë Socialiste nuk u përmend në asnjë moment fjala LSI, por u dhanë disa mesazhe të qarta për aleaten qeverisëse.
Të paktën tre mesazhe të Ramës ishin për Ilir Metën duke i lënë atij rrugë të lirë për të iku nga koalicioni para zgjedhjeve.
Së pari, Rama u kërkoi deputetëve që të mos mungojnë në votimin e ministrave të rinj në Kuvend, që tregon mobilizimin e PS-së për t’i bërë 71 votat e nevojshme me forcat e veta dhe të aleatit e sigurt, PDIU-në e Idrizit. Ky mobilizim merr parasysh çdo vendim të LSI-së, pra votën kundër të deputetëve të saj.
Së dyti, Rama u kërkoi deputetëve që të nisin fushatën zgjedhore dhe të dalin në bazë për t’u përgatitur për zgjedhjet e reja. Nga ana tjetër mori vendim për mbledhur institucionet e partisë, Asamble dhe Kongres, në funksion të kësaj fushate, ku nuk u përmend fare aleanca parazgjedhore me aleaten qeverisëse, LSI.
Së treti, Rama e tha hapur se PS është gati të dalë e vetme në zgjedhje dhe të dalë forcë e parë, edhe më e fortë se zgjedhjet e 2013-ës. Pra edhe në këtë rast PS e mori përballë “rrezikun” vetëm pa LSI-në me të cilën u fut në zgjedhjet e fundit në koalicion.
Pas këtyre mesazheve LSI-së i bëhet e qartë se nuk është pjesë e llogarive elektorale të PS-së, ndaj e ka rrugën hapur të dalë nga koalicioni dhe të futet e vetme ose me PD-në në zgjedhjet e reja. /tesheshi.com/
