Edi Rama deklaroi para zgjedhjeve se për herë të parë në historinë e politikës asnjë nuk do të kontestojë zgjedhjet; dhe se humbësi do të urojë fituesin; pasi sipas tij për herë të parë në histori opozita do e ndjekë nga brenda të gjithë procesin.
Por nuk ka gjasa të ndodhë kështu; dhe duket se ky standard normal në një demokraci do mbetet sërish tabu për Shqipërinë.
Lulzim Basha, i cili u zgjodh nga votuesit më 25 qershor që të mbetet në opozitë, në prononcimin e parë pas humbjes u vuri “vulën e zezë” zgjedhjeve duke i konsisderuar ato “të blera”, edhe pse e kishte humbur këtë të drejtë morale qyshse futi në qeveri një skuadron të tij kontrolluese me disa ministra teknikë.
Të njëjtën thanë edhe kandidatë të Bashës në zgjedhje që nuk u zgjodhën deputetë, si Preç Zogaj.
Ky i fundit deklaroi se “Rama e preu në besë Bashën që të nesërmen e marrëveshjes” dhe foli për rënie të vlerës së euros në treg, pasi sipas Zogajt zgjedhësve u janë dhënë lekë të thata në dorë, meqë sipas tij ata nuk e preferonin monedhën europiane, për shkak të përtesësn për të shkuar në excange.
Është kjo një alibi që pritet të zyrtarizohet në ditët në vazhdim, sidomos gjatë garës që Lulzim Basha do të zhvillojë për të qëndruar apo për të marrë një mandat të ri për krytarin e Partisë Demokratike; një alibi që pritet të zyrtarizohet me një raport të posaçëm të ministrave teknikë, që sipas burimeve pranë qeverisë, kanë përgatitur një dokument ku do të denoncojnë raste të shumta të deformimit të votës.
Ende nuk dihet nëse ky denoncim do të përbëjë raste konkrete për t’i dërguar në Prokurori, por në fakt Partia Demokratike ka pasur si asnjëherë tjetër gjysmën e qeverisë dhe kryetarin e KQZ-së, potencial që të paktën mund të parandalonin dhe madje të ndalonin atë që ata e nxjerrin sot si casuss beli për zgjedhjet e 25 qershorit.
Kontestimi i zgjedhjeve është bërë tashmë një zakon i politikës shqiptare që nga viti 1992. Edhe atëherë partia në pushtet që humbi zgjedhjet, PS-ja deklaroi në parlamentin e dalë nga 22 marsi se pati raste të vjedhjes së votave por në fund zgjedhjet i njohu.
Për ilustrim po japim zgjedhjet e vitit 2009.
Në atë kohë PD kishte shumicën në KQZ. Partia Socialiste kërkoi që të rinumërohen votat në disa qendra votimi, si në Fier, Berat, Shkodër dhe Tiranë.
Me rregull, nëse një anëtar i KQZ-së kërkon rinumërim duhej të vendosej ky akt, por me shumicë votash KQZ-ja e hodhi poshtë.
Më pas PS kërkoi tëq hapen vetëm kutitë e materialeve zgjedhore nga një komision i posaçëm parlamentar, siç ndodhi në vitin 2005 nga parlamenti i dalë nga zgjedhjet e 3 korrrikut të atij viti.
Por mazhoranca e drejtuar nga kryeministri i asaj kohe Sali Berisha nuk pranoi.
Gramoz Ruçi i lëshoi një sfidë Sali Berishës në Parlament, tha: “hap vetëm kutitë e fshatit Ruzhdie në Fier. Nëse dalin të rregullta unë largohen nga politika, nëse nuk dalin të rregullta nis hetimin”. Por Berisha sërish nuk pranoi.
Madje më vonë i dogji demonstrativisht fletët e votimit në lumin Erzen live para kamerave.
Por çfarë ndodhi më pas?
Prokuroria e drejtuar nga Ina Rama, me kërkesën e PS-së nisi hetimet në Shkodër, Lezhë dhe Fier.
Nga hetimet doli se në fshatin Ruzhdie kishin votuar njerëz që nuk ishin prezentë, të tillë edhe në Shkodër por edhe në Lezhë.
Për herë të parë gjykatat dënuan edhe komisionerët përkatës në vitin 2012. Një rast që u la në hije nga mediat në atë kohë.
Pra pati një proces që u shoqërua me fakte, kërkesa dhe në fund me denoncime konkrete.
Edhe tani, nëse flitet për një proces “me blerje” që mund të shkaktonte deformimin e votës së popullit, më e ndershme do të ishte të flitet me emra e mbiemra, zona zgjedhore, qendra votimesh dhe dëshmi konkrete që do të sillnin raste penale që të mund të ndëshkoheshin më pas ligjërisht.
Por të shikosh votat që sollën rezultatin e 25 qershorit, një analizë e thjeshtë nxjerr përfundimin se PS mori përgjithësisht votat e saj që ka marrë në 2009 dhe 2013. PD humbi vota, përgjithësisht 200 mijë të tilla ose nga abstenimi ose nga devijimi drejt LSI-së që luajti me situatën brenda Partisë Demokratike.
Ky tregues do marrë në analizë dhe sesi LSI i mori këto vota.
Megjithatë duhet pritur raporti i ministrave teknikë, që pritet të mbyllet brenda dy ditësh për të folur më qartë…/tesheshi.com/
