Studiuesi i famshëm musliman Tarik Ramadan u lirua nga akuzat për përdhunim dhe detyrim seksual, pasi një gjykatë zvicerane nuk gjeti prova kundër ish-profesorit të Universitetit të Oksfordit.
Avokatët e paditësve u zotuan të mërkurën se do të apelojnë vendimin për çështjen, e cila po shqyrtohet në Gjykatën Penale në Gjenevë.
Akademiku gjithashtu mori rreth 151,000 franga zvicerane (167,000 dollarë) si dëmshpërblim nga kantoni zviceran i Gjenevës për rastin.
Pas leximit të vendimit në Gjykatën Penale të Gjenevës, studiuesi 60-vjeçar zviceran qeshi dhe u përqafua nga njëra prej vajzave të tij.
Gruaja zvicerane 57-vjeçare, e identifikuar me emrin e rremë “Brigitte”, e cila e ka paditur, u largua nga salla e gjyqit para se të jepej vendimi.
Gruaja akuzoi Ramadanin për përdhunimin e saj në një hotel në Gjenevë në vitin 2008.
Javën e kaluar, prokurorët kërkuan një dënim me tre vjet burg për Ramadanin.
“Harroje se jam Tarik Ramadan”
Kjo ishte hera e parë që ai gjykohej për përdhunim, megjithëse rrezikon të përballet me gjyqin në Francë për akuzat e sulmit seksual.
Avokati që përfaqëson “Brigitte”, një e konvertuar në Islam, tha se ajo ishte përdhunuar vazhdimisht dhe i ishte nënshtruar “torturës dhe barbarizmit”.
Ramadan, një figurë e shquar në Islamin Evropian, i hodhi poshtë akuzat, duke këmbëngulur se nuk kishte asnjë aktivitet seksual mes tij dhe “Brigitte”, duke thënë se ai ishte viktimë e një “kurthi”.
Në ndërkohë, mbrojtja këmbënguli në pafajësinë e Ramasanit dhe theksoi se nuk ka asnjë provë shkencore për këtë rast.
Gjatë deklaratave përmbyllëse në gjykatë javën e kaluar, Ramadan kërkoi të mos gjykohej për “ideologjinë e tij reale ose të perceptuar” dhe u kërkoi gjyqtarëve të mos “ndikoheshin nga media dhe zhurma politike”.
“Harroje që unë jam Tarik Ramadan”, tha ai.
“Brigitte” ishte në të dyzetat në kohën e sulmit të supozuar në 2008.
Ajo ngriti padinë 10 vjet më vonë, duke i thënë gjykatës se ndihej e inkurajuar të dilte përpara pasi padi të ngjashme u ngritën në Francë.
Studiuesi me origjinë zvicerane u arrestua në vitin 2018, pasi disa gra dolën përpara dhe vendosën ta akuzojnë atë për sulm seksual në dritën e lëvizjes #MeToo.
Atij iu dha lirimi me kusht në ato raste pas gati 10 muajsh në paraburgim francez.
Nipi i themeluesit të Vëllazërisë Myslimane
Avokatët e tij akuzuan gjithashtu “Brigitte” dhe gratë që ngritën akuza kundër tij në Francë për komplot për të rrëzuar dijetarin musliman, duke përmendur “Ramadanfobinë”.
Ramadan vazhdimisht i ka mohuar të gjitha akuzat.
Ai është nipi i Hassan al-Banna, themeluesit të Vëllazërisë Myslimane egjiptiane.
Një figurë e diskutueshme në Perëndim, Ramadan fitoi doktoraturën në Universitetin e Gjenevës.
Ai ishte profesor i Studimeve Islame Bashkëkohore në Oksford deri në nëntor 2017 dhe ka mbajtur role vizitore në universitete në Katar dhe Marok.
Ramadani u detyrua të merrte një pushim kur u shfaqën akuza për përdhunim në Francë për sulme të dyshuara midis 2009 dhe 2016. /tesheshi.com/
