Të shtunën, Prishtina sërish do të jetë mikpritës i protestës së organizuar nga partitë opozitare në Kosovë. Por për dallim nga protestat e kaluara, protesta e së shtunës do të jetë më e “varfër” pasi nuk do të merr pjesë partia më e madhe opozitare, Lëvizja Vetëvendosje.
Nuk do të jetë në ballë të marshit protestues njeriu i lindur për të protestuar, Albin Kurti, por prijës këtë herë do jenë kreu i AAK-së Ramush Haradinaj dhe lideri i partisë NISMA për Kosovën, Fatmir Limaj.
Por sa do jetë masive protesta pa përkrahësit e VV-së, çfarë efekti pritet të ketë, tregon Smajl Latifi, anëtari i Kryesisë së AAK-së.
Latifi në një intervistë dhënë për portalin tesheshi.com flet edhe për çështjen e Demarkacionit me Malin e Zi si dhe për atë nëse do të kandidoj për kryetar të komunës së Rahovecit në zgjedhjet lokale që mbahen vitin e ardhshëm.
Intervistoi: Blendi Gashi
Nesër partia juaj AAK dhe NISMA për Kosovën do të protestojnë në Prishtinë, sa jeni mobilizuar?
Po, do të protestohet nesër në Prishtinë. AAK dhe NISMA si organizatore janë plotësisht të mobilizuara.
Lëvizja Vetëvendosje ka paralajmëruar se nuk do t’i bashkangjitet protestës. Sa mund të jetë masive protesta pa partinë e parë opozitare?
Protesta e organizuar nga AAK dhe NISMA do të jetë masive. Pritet të jetë edhe më masive se sa protestat e kaluara ku në organizim ishte edhe VV. Interesimi i qytetarëve tanë është jashtëzakonisht i madh për të shprehur pakënaqësinë, mospajtimin dhe kundërshtimin ndaj gjendjes ekzistuese në Kosovë. Na vjen keq që VV mban një qëndrim të pakuptimtë, konformist, të ngurtë ndaj protestës. VV për herë të parë nuk është në organizim dhe siç po thotë vetë, nuk e mbështet një protestë me karakter civilizues dhe paqësor e cila është vazhdimësi e drejtpërdrejtë e kundërshtimit konkret të së keqes që po e rëndon Kosovën dhe të vendimeve të gabuara që i ka marrë kjo qeveri, e cilësuar realisht kundërkushtetuese, në dëm të sovranitetit, pavarësisë dhe integritetit territorial të Republikës së Kosovës. E thënë shkurt, protesta do të jetë masive edhe pa VV.
Përveç një grupi të studentëve kush ka shpreh gatishmërinë që t’i bashkangjitet protestës?
Jo vetëm një grup i studentëve, por janë 5 organizata studentore që fuqishëm do të jenë bashkë me dhjetramijëra qytetarë që do ta madhështojnë protestën. Ka edhe OJQ, sportistë, artistë, qytetarë të moshave të ndryshme e të të dy gjinive, pastaj, grupet e interesit, qytetarë të profileve e profesioneve të ndryshme që janë të pakënaqur dhe duan t’i kontribuojnë Kosovës të ec në rrugën e pashmangshme drejt ndryshimit.
Cili është qëllimi i protestës, çfarë rezultate prisni konkretisht pas mbajtjes së saj?
Të kundërshtohen dy marrëveshjet famëkeqe. “Zajednica” dhe Demarkacioni me Malin e Zi, ku si të tilla ato s’mund të jetësohen në shtetin e pavarur dhe sovran të Kosovës. Po ashtu, protesta do të zhvillohet kundër qeverisë antikushtetuese dhe qeverisjes së keqe. Në shesh do të kërkohet llogari për gjithë ato të këqija që po i ndodhin Kosovës. Njëkohësisht me vendosmërinë më të madhe do t’i thuhet jo kapjes së shtetit; jo krimit dhe korrupsionit në shkallë endemike. Pas kësaj proteste madhështore gjithë qytetare do të ketë gjithnjë mundësi e më pak për qeverinë antikushtetuese. Kosova s’duron më të përfaqësohet, për më keq, të udhëhiqet nga një grusht pushtetarësh që në emër të Kosovës, ja kanë zënë diellin Kosovës dhe qytetarëve tanë. Çfarëdo përpjekje për ndryshim ka vlerë, ndërkaq heshtja është pajtim me të keqen. Protesta e 14 majit është kontribut i madh që i shërben ndryshimit. Gjithsesi aktivizmi gjithë qytetar çon pashmangshëm kah rezultati, për ç’gjë po angazhohen dhe i meritojnë qytetarët e pakënaqur, e që janë shumica dërmuese në Kosovë.
Realisht sa mendoni se do të jetë numri i protestuesve që do të dalin në protestë, mund të arrij deri në 10 mijë?
Do të jenë me dhjetra e dhjetramijëra që do të protestojnë në sheshin “Skënderbeu”.
Si e vlerësoni kushtin e BE-së që për liberalizim të vizave së pari të ratifikohet Marrëveshja për demarkacion me Malin e Zi?
Liberalizimin do ta marrim përkundër të njëfarë kriteri sa të padrejtë po aq edhe të gabuar që BE ia paska vënë Kosovës, për të ratifikuar demarkacionin me Malin e Zi. Shtetet në rajon janë bërë edhe anëtare të BE-së (Kroacia dhe Sllovenia) edhepse kontestet kufitare ende nuk i kanë të mbyllura. Mali i Zi e ka marrë liberalizimin pa kurrfarë kushtëzimi. Edhe Kosova do ta fitojë këtë të drejtë ende të mohuar, pa u kushtëzuar që t’i falë toka dikujt. Shqetësimi dhe përkushtimi i AAK-së e NISMA-s është që domosdoshmërisht të bëhet korigjimi i gabimeve të rënda në versionin aktual të demarkacionit dhe pas kësaj, të vie në shprehje një version i drejtë dhe real i cili mund të ratifikohet në Kuvendin e Kosovës.
Si do të veproni në seancën kur do të sillet për ratifikim para deputetëve ratifikimi i Marrëveshjes për Demarkacion me Malin e Zi?
Së pari duhet të korigjohen gabimet e bëra në një proces të bërë keq nga komisioni shtetëror, i cili lindi marrëveshje të dëmshme të gabuar. Ngase çdo përpjekje për ta ratifikuar këtë version është i papranueshëm dhe çmimin e paguan Kosova. E drejta për ta mbrojtur tokën e Kosovës me çdo çmim, nuk i jep të drejtë bash askujt të hedhë benzinë në zjarr. AAK dhe NISMA janë kundër dhe nuk besojnë se ka deputetë që marrin kurajon, mundimin dhe guximin të ngrejnë dorën për faljen e mijërave hektarëve tokë të Kosovës, Malit të Zi.
Për një mandat keni udhëhequr komunën e Rahovecit. Vitin e ardhshëm mbahen zgjedhjet lokale. A do garoni sërish për të parin e kësaj komune?
Tri vjet isha në krye të komunës së Rahovecit, sepse pati zgjedhje të jashtëzakonshme pas një viti të qeversisjes nga Qazim Qeska i cili pati dhënë dorëheqje nga posti ikryetarit të Rahovecit.
Gjithnjë përpiqem të jap shumë nga vetja ime e të jem në shërbim të qytetarëve të vendit. Nëse kërkohet nga unë, atëherë do të kërkojë ballëhapur besimin që të vëhem me tërë qenien edhe në shërbim të qytetarëve të Rahovecit. /tesheshi.com/
