Nga Vegim Rrashiti
Spekulimet se dikush deshi t’i mbysë banorët e Prishtinës duke ua helmuar ujin ishin të ngutshme, madje të pa menduara mirë sepse dolën të jenë të pavërteta. Hipoteza të tilla do të duhej të (mos)plasoheshin në media me shumë kujdes për shkak të panikut e eskalimit të situatës që mund të shkaktojnë. Për më keq kur këto hipoteza dalin të pavërteta, keqbërësve u është mësuar një mënyrë e mirë për të bërë me lehtësi krime të mëdha.
Përmes këtyre situatave të shoqëruara edhe me fushata të egra mediale po tentohet të futet frikë në mesin e njerëzve. Ata që dalin me një mendim kundër, menjëherë etiketohen me lloj-lloj termash në mënyrë që askush të mos guxojë të dalë kundër me një mendim më ndryshe.
Te jesh kundër politikës aktuale apo fushatave (gjithsesi joprofesionale e jo etike, madje edhe të rrezikshme), nuk do të thotë se je përkrahës i ISIS, taleban, anti-kombëtar apo “shqipfolës” siç shpesh etiketohen personat që nuk pajtohen me politikën apo fushatat mediale.
Politika nuk duhet që me çdo kusht të shpikë raste ekstremizmi në Kosovë që para Perëndimit ta paraqesë veten si ‘luftues të ekstremizmit’, sepse kjo lojë është shumë e rrezikshme, nxit urrejtje dhe më e keqja dëmton rëndë imazhin e Kosovës.
Kjo më së miri dëshmohet me rastin e fundit ku shumë medie ndërkombëtare raportuan se pjesëtarë të ISIS helmuan ujin e Prishtinës. Në mediet më prestigjioze botërore akoma vazhdon të qarkullojë lajmi se Prishtina ende është pa ujë shkaku i helmimit, ndërkohë që asnjë nga këto medie nuk demantoi këtë lajm e spekulim të pavërtetë.
Nëse ne vetë nuk jemi të kujdesshëm, askush nuk do të na i heqë këto njolla që po ia vendosim vetvetes, e që gjithsesi Kosovës po i kushtojnë shtrenjtë në rrafshin ndërkombëtar. Gjithsesi më lehtë do ta kishim ta pastrojmë ujin e helmuar se ta pastrojmë imazhin e krijuar tani para botës. /tesheshi.com/
