Kancelari gjerman Olaf Scholz bëri thirrje për vazhdimin e negociatave ndërkombëtare për luftën në Ukrainë në mënyrë që të hapet rruga për paqen, por nuk bëri premtime për vazhdimin e dhënies së ndihmës ushtarake për Kievin.
“Bisedimet e fundit mbi sigurinë e Ukrainës të organizuara nga Arabia Saudite ishin shumë të rëndësishme, por ky është vetëm fillimi,” tha ai në një intervistë për televizionin publik gjerman ZDF.
Kancelari përshëndeti veçanërisht pjesëmarrjen e Kinës, si dhe diplomatët e përfshirë në bisedimet në Riad.
Kina, ndoshta partneri më i rëndësishëm ndërkombëtar i Rusisë, më parë shmangu një samit ndërkombëtar në Kopenhagë, të mbajtur në qershor.
“Kjo është arsyeja pse ka kuptim vazhdimi i këtyre bisedimeve, sepse ato në mënyrë specifike rrisin presionin ndaj Rusisë në mënyrë që ajo të kuptojë se ka shkuar në rrugën e gabuar dhe të tërheqë ushtarët e saj dhe të lehtësojë arritjen e paqes”, tha Kancelari.
Raketat Taurus “në pritje”
Rusia nuk u ftua në takim, i cili përfshinte këshilltarë dhe përfaqësues të sigurisë kombëtare nga më shumë se 40 vende, duke përfshirë Ukrainën, Shtetet e Bashkuara, Gjermaninë, Kinën, Indinë, Brazilin dhe Afrikën e Jugut, si dhe organizata ndërkombëtare, përfshirë Kombet e Bashkuara.
Scholz u pyet nëse Berlini është i gatshëm t’i dorëzojë Ukrainës raketat Taurus për mbrojtje kundër agresionit rus, po ai nuk dha një përgjigje të qartë.
“Si më parë, qeveria(gjermane) gjithmonë do të analizojë me kujdes çdo vendim të vetëm: të shkojë me atë që është e mundur, çfarë është kuptimplotë, çfarë mund të jetë kontributi gjerman,” tha Scholz.
Gjermania do të vazhdojë si më parë, shtoi ai, që do të thotë se Berlini do të vazhdojë të zbatojë një politikë vendimesh të kujdesshme kur bëhet fjalë për mbështetjen ushtarake për Kievin.
Mendimi i Kancelarit është se shumica e qytetarëve gjermanë ndajnë pikëpamjen e tij.
“Vendimet duhet të peshohen me kujdes”, tha ai dhe shtoi “Unë do të vazhdoj kështu dhe e them shumë qartë”.
Ukraina vazhdon të bëjë presion ndaj qeverisë gjermane që ta furnizojë me raketa Taurus për t’u mbrojtur kundër pushtimit rus të nisur 17 muaj më parë.
“Ukraina ka nevojë për këto raketa për të shpëtuar më shumë jetë të ushtarëve dhe civilëve ukrainas dhe për të përshpejtuar çlirimin e territoreve të saj”, tha ministri i Jashtëm ukrainas Dmytro Kuleba për Bild.
“Formula është e thjeshtë: sa më i gjatë të jetë rrezet e raketës, aq më e shkurtër do të zgjasë lufta,” tha Kuleba.
Presioni mbi Kancelarin po rritet
Ai vuri në dukje se me këto armë, Ukraina mund “të arrijë forcat pushtuese ruse në tokën ukrainase larg vijave të frontit, mund të prishë logjistikën dhe të shkatërrojë qendrat e komandës dhe depot e municioneve”.
Presioni ndaj Scholz-it në lidhje me këto raketa po rritet edhe brenda Gjermanisë.
Politikanët nga partitë në pushtet dhe opozita kërkuan që forcat e armatosura të Ukrainës të pajisen me armë të përshtatshme për shkatërrimin e bunkerëve dhe postave komanduese të mbrojtura në një distancë prej 500 kilometrash.
Përkrahësit e këtij opsioni e shohin atë si një hap drejt forcimit të aftësive mbrojtëse të Ukrainës.
Megjithatë, ka edhe një debat nëse Ukraina do t’i përdorte këto raketa për sulme të mundshme në territorin rus dhe si të parandalohej një zhvillim i tillë.
Kuleba përsëriti se ato do të përdoren vetëm brenda kufijve të Ukrainës.
“Frika se objektivat mund të jenë në tokën ruse janë të pabaza”, tha ai.
Dorëzimi i dronëve Luna NG
Ndërkohë, grupi gjerman i armëve Rheinmetall ka konfirmuar se do të fillojë furnizimin me drone zbulimi në Ukrainë.
Dorëzimi do të fillonte në fund të vitit, tha zëdhënësi i kompanisë, pa specifikuar sasi specifike.
Bëhet fjalë për dronët e zbulimit Luna NG, të cilët nuk do të jenë të armatosur.
Ata mund të fluturojnë disa qindra kilometra dhe të përgjojnë ose parandalojnë komunikimet e armikut.
Porosia është bërë nga qeveria gjermane, e cila furnizon Ukrainën me drone.
Prodhuesi më i madh gjerman i mbrojtjes ka dorëzuar tashmë shumë pajisje ushtarake dhe po përgatit të reja.
Rheinmetall dëshiron të nënshkruajë një kontratë direkt me Kievin për ndërtimin e një fabrike tankesh në Ukrainë. /tesheshi.com/
