Administrata e burgut ku është vendosur Alexei Navalny po kërcënon ta ushqejë atë me forcë, pasi kritiku i Kremlinit është në një grevë urie dhe ka humbur 15 kilogramë që kur mbërriti në burg muajin e kaluar, thanë aleatët e udhëheqësit të burgosur të opozitës.
Navalny peshon 77 kilogramë, tetë më pak se pesha në fillim të grevës së urisë dhe 15 më pak se pesha në kohën e mbërritjes së tij në koloninë penale, tha llogaria zyrtare e Alexei Navalny në Twitter.
“Duke kuptuar seriozitetin e grevës së urisë, administrata kërcënon të fillojë ushqimin me forcë çdo ditë. Në të njëjtën kohë, Alexei u transferua nga departamenti mjekësor,” shtoi njoftimi.
Aleatët e Navalny pretendojnë se administrata e burgut nuk lejon që i burgosuri të ekzaminohet nga një mjek i jashtëm, raporton Reuters.
Në fund të marsit, udhëheqësi i opozitës ruse dhe kundërshtari i presidentit rus Vladimir Putin filloi një grevë urie, duke kërkuar që ai të merrte kujdesin e duhur mjekësor në burg për shkak të dhimbjeve akute të shpinës dhe këmbës.
Kremlini nuk pranoi të komentonte mbi shëndetin e Navalny, duke shpjeguar se kjo ishte çështje e shërbimit të burgut shtetëror.
Ky shërbim tha më parë se Navalny po merrte terapinë e nevojshme.
Navalny u burgos në shkurt dhe u dënua me dy vjet e gjysmë burg për shkeljen e një dënimi me kusht.
Amnesty International pohoi javën e kaluar se Navalny, i cili u helmua nga një agjent nervor vitin e kaluar, tani vuan nga mungesa e gjumit dhe se nuk ka asnjë mjek në burg që mund të kurojë.
“Rusia, ose më mirë autoritetet ruse, mund ta vendosin Navalny në një situatë vdekjeje të ngadaltë dhe duke u përpjekur të mbulojnë atë që po ndodh me të vërtetë,” i tha Reuters në atë kohë Sekretarja e Përgjithshme e Amnesty International, Agnes Callamard. /tesheshi.com/
