I vetmi emër i ri fringo në qeverinë e dytë të Edi Ramës është financierja nga Shkodra, deputetja e PS-së dhe një bankiere në profesion: Senida Mesi.
Zv.kryeministrja e re është në pragun e të 40-ave, por është një profesioniste që vjen nga bankat e nivelit të dytë më shumë sesa një aktiviste politike.
Zonja Mesi, megjithëse një grua në karrierë është nënë e tre fëmijëve dhe përfaqësuese e një familje qytetare shkodrane.
Përgjithësisht ka qenë e majtë politikisht por u aktivizua më shumë kur shërbeu si kreu i fushatës së Keti Bazhdarit në zgjedhjet për bashkinë e shkodrës në vitin 2015.
Sonila Qato, ministrja e Shtetit për Marrëdhëniet me Sipërmarrjen është thuajse në një moshë me Mesin, dhe ka një të kaluar si teknokrate, në fillim në bashkinë e Edi Ramës dhe për katër vjet në Agjencinë e Kthimit dhe Kompensimit të Pronave. Është e bija e Lambi Gegpriftit, ish-pjesëtar i nomenklaturës së PPSH-së, por një njeri që nuk pati histori përlyerje dhe korrupsioni, të paktën nuk u denoncua si i tillë.
Pandeli Majko, rithehet ministër pas 12 vitesh, këtë radhë me një detyrë të rëndësishme që t´a kthejë diasporën si pjesë reale e votuesve dhe kontribuesve të Shqipërisë. A qenë dy herë kryeministër, dy herë ministër i Mbrojtjes, është deputet i PS-së që nga viti 1992 dhe ka qenë pjesë e lëvizjes studentore.
Fatmir Xhafa, rimerr ministrinë e Brendshme pasi e shijoji vetëm për një muaj. Ish-kryetar i Komisionit Parlamentar për Reformën në Drejtësi, pritet të akuzohet fort nga opozita si ish-hetues në kohën e diktaturës. Xhafës i është nxjerrë shpesh fotoja me Enver Hoxhën, por siç duket ajo i sjell më shumë fat. Bëhet për herë të tretë minister, pasi ka qenë dy herë me Fatos Nanon, i Drejtësisë dhe i Pushtetit Vendor.
Ditmir Bushatin e shkarkuan thuajse të gjithë në media, por duket se nuk e kishin kuptuar fare mesazhin e Edi Ramës. Nuk kishte si t´a bënte kryeministri një gjë, për një njeri që i ka besuar thuajse të gjithë operacionin e lëvizjeve të tij diplomatike. Madje në ditët më të këqija pas fitores së Trumpit, Rama dërgoi Ditmir Bushatin në Uashington, i cili vuri lidhjet me administratën e re. Por e rëndësishme është se me Bushatin, Rama u dërgon sinjal partnerëve që nuk keni pse prisni surpriza pasi atë e njohin.
Olta Xhaçka, e cila gjithashtu e shijoi vetëm një muaj qeverinë pasi erdhën teknikët, rivlerësohet nga Rama duke i dhënë dikasterin e Mimi Kodhelit. Xhaçka ka ardhur në PS nga Mjafti, por që prej 8 viteve është ngritur në strukturat më të larta dhe drejton Forumin e Gruas.
Arben Ahmetaj, bashkë me Damian Gjiknurin, është njeriu më i fuqishëm i qeverisë së Edi Ramës. Ai ka marrë jo vetëm Financat, por edhe ministrinë e Ekonomisë dhe atë të Punës e të Mirëqenies Sociale.
I diplomuari për anglisht, ka mbi shpatullat e tij një superdikaster që edhe pse Rama ia dha me kusht dhe deadline, duket gjë e frikshme. Ahmetaj ka qenë ministër Integrimi në kohën e Nanos, por dy herë ministër në kohën e Ramës: ministër i Ekonomisë dhe më pas i Financave.
Damian Gjiknuri, është gjithashtu njeriu kyç dhe realisht që ka në dorë sasinë më të mëdha të parave: do të drejtojë Energjitikën, pra naftën, KESH, OST, OSHE por edhe rrugët, aeroportet, portet etj. Fitoret e Gjiknurit në Dibër dhe Vlorë i kanë dhënë fuqinë e madhe të konsiderimit nga Rama si një “as” nën mëngë.
Është sulmuar shumë nga PD e Meta, të cilët i përgatitën edhe një dosje në prokurori, por që nuk rezultoi gjë. Është njeriu që ka qenë mankthi i Ilir Metës me dosjen e “CEZ-DIA-s.
Ogerta Manastirliu, drejtoi për 4 vjet QSUT-në, më pas ministrinë e Shëndetësisë për një muaj, fitoi në njësinë 9 si kryetare e shtabit elektoral, duke u imponuar si një grua e fortë që pritet të jetë një nga më të pushtetshmet e qeverisë “Rama 2”. Vjen në qeverisje nga stafi i Edi Ramës në Bashkinë e Tiranës.
Lindita Nikolla, ishte thuajse emri i vetëm për të cilën thuhej se nuk do të lëvizte nga arsimi. Ka qenë njëriu që ka zbatuar strategjinë e Ramës për arsimin, por edhe nuk depërtoi shumë sulmin e kundërshtarëve duke përdorur “diplomacinë mirditore”. Nikolla, Ramës i ka treguar gjithmonë se mund të fitojë zgjedhje: e ka bërë në Tiranë 3 herë që ka kandiduar dhe herën e fundit në Lezhë arriti që nga fundi ta kthejë PS-në forcë e parë.
Blendi Klosi, njeriu i fuqishëm politik i PS-së që ishte një lob i Vangjush Dakos, tashmë drejton qarkun e Beratit, ku e ndaloi revanshin e LSI-së në qytetin ku kryeson Bashkinë.
Klosi është hera e katërt që bëhet ministër, ku tre herë i ka pasur me Fatos Nanon,
Mirela Kumbaro, dejavu-ja e Edi Ramës do të ishte edhe në dikasterin ku risia nuk jep kosto, madje mund të sillte më shumë energji. Por Rama emëroi sërish motrën e mikut të vjetër, që në mandatin e pare, gjithsesi tregoi një menaxhim të qetë dhe me qytetari. Filologia e frëngjishtes vjen për herë të dytë në mandatin e një dikasteri.
Shkurt, asnjë ministri nuk është risi, përveç numrit dy të qeverisë , që sipas gjasave do të jetë një lloj stenografe menaxhuese e axhendës shumë të ngjeshur të Edi Ramës, i cili pasi mendoi gjatë, arriti në përfundimin se mund të ecë para me njerëzit që u beson më shumë. /tesheshi.com/
