Bashkëthemeluesi i Microsoft dhe një anëtar drejtues i Fondacionit Bill & Melinda Gates, është një krimb i njohur i librave. Sipas raportimeve, ai lexon rreth 50 libra në vit dhe merr me vete një çantë plot me libra në pushime. Gates inkurajon të rinjtë, të cilët duan të lënë një shenjë pozitive në botë, të kultivojnë një zakon të leximit dhe të gjejnë një aftësi që u pëlqen. “Çdo libër më mëson diçka të re ose më jep një këndvështrim tjetër. Unë isha me fat që kisha prindër që inkurajonin leximin. Kjo më ka forcuar kuriozitetin për botën, gjë që besoj se më ka ndihmuar si në karrierën time ashtu edhe në punën time me fondacionin tim”, tha ai për revistën amerikane Time.
Që nga largimi nga bordi i drejtorëve të Microsoft-it në vitin 2020, Gates i është përkushtuar veprimeve filantropike që fokusohen në çështje kritike globale, si ndryshimi i klimës, shëndeti global dhe arsimi. Më poshtë janë pesë librat që ai rekomandon në blogun e tij personal, Gates Notes.
“Jo fundi i botës” – Hannah Ritchie
Në konferencën e OKB-së për ndryshimet klimatike (COP29), liderët nga sektori publik, privat dhe social po diskutojnë mënyrat për të përshpejtuar përpjekjet për të trajtuar krizën klimatike. Një nga librat që rekomandon Gates, “Jo fundi i botës” nga Hannah Ritchie, është veçanërisht në kohën e duhur. Siç vëren ai, është shpesh më e lehtë për njerëzit të mbajnë gjurmët e zhvillimeve më të fundit mbi ndryshimin e klimës sesa të kuptojnë tendencat afatgjata. Libri i mbushur me fakte i Ritchie-t ofron një perspektivë më të gjerë mbi krizën, duke treguar përparimin që ka bërë njerëzimi në fusha të tilla si ulja e vdekshmërisë së fëmijëve dhe përmirësimi i aksesit në burimet bazë, duke sfiduar narrativën e zakonshme “katastrofike” rreth ndryshimeve klimatike.
Autori sugjeron gjithashtu zgjidhje praktike për të vazhduar trajtimin e problemeve klimatike, duke theksuar nevojën për bashkëpunim midis vendeve më të pasura dhe më të varfra për të miratuar zgjidhje novatore.
“Fuqia” – Naomi Alderman
Romani fantastiko-shkencor i Alderman, i cili iu rekomandua Gates-it nga vajza e tij Jennifer, gërmon në atë që ndodh kur gratë papritmas fitojnë aftësinë për të lëshuar goditje të fuqishme elektrike nga trupi i tyre. Siç vë në dukje Gates, bota më mirë do të zhytet në trazira të dhunshme sociale sesa të drejtohet në integrimin e një shoqërie që kremton barazinë gjinore. Libri gjithashtu i kujtoi atij sfidat me të cilat përballen gratë sot, duke theksuar nevojën për të vazhduar luftën për barazinë gjinore.
“Si të njohim një person” – David Brooks
Si një introvert vetë, Gates e gjeti librin e David Brooks interesant dhe të dobishëm. Libri sugjeron një mënyrë jetese më humane, duke i inkurajuar lexuesit që të marrin pjesë aktive në ndërveprimet e tyre të përditshme, të bëjnë pyetje të menduara dhe të dëgjojnë me interes të vërtetë atë që të tjerët kanë për të ndarë. Ai gjithashtu hedh dritë mbi mënyrën se si po rritet vetmia dhe sesi shkëputja në epokën dixhitale mund të çojë në ndarje sociale dhe politike, duke treguar se marrëdhëniet reale janë më të rëndësishme nga sa mendojmë.
“Fjalë të reja të guximshme” – Salman Khan
Pedagogu amerikan Salman Khan dhe mik i Bill Gates, është themeluesi i Khan Academy, platforma jofitimprurëse e edukimit online me mbi 150 milionë studentë në mbarë botën. Në librin e tij ai analizon se si inteligjenca artificiale mund të revolucionarizojë arsimin duke ofruar përvoja të personalizuara dhe krijuese të të mësuarit. Khan thekson se AI mund të transformojë arsimin, duke i lejuar mësuesit të kalojnë më shumë kohë duke u lidhur me studentët e tyre. Megjithatë, ai njeh sfida të tilla si mbrojtja e privatësisë së studentëve dhe si të sigurohet akses në teknologji për të gjithë.
“Bujaria infective” – Chris Anderson
Në librin “Infectious Generosity”, Chris Anderson, krijuesi i organizatës jofitimprurëse TED, analizon sfidat e filantropisë në epokën dixhitale. Autori e pranon se teknologjia e komunikimit është një thikë me dy tehe: ajo lidh njerëzit, por gjithashtu mund t’i largojë ata përmes keqinformimit. Gates e gjen veçanërisht frymëzues angazhimin e autorit për të krijuar një botë më bujare, megjithëse ai e pranon se disa nga sugjerimet e tij janë të vështira për t’u zbatuar. /tesheshi.com/
