Nga Ylli Pata
Fitorja e Dibrës ka nxjerrë në pah një marrëdhënie ndryshe mes PS-së dhe LSI-së që prej ardhjes në pushtet në 2013.
Siç mësohet nga burime brenda PS-së, pas fitores së bashkisë së Dibrës, është rritur tensioni mes dy partive për shkak të shkarkimit të disa zyrtarëve në arsim.
Ndërkaq, Edi Rama ia ka besuar drejtimin e fushatës së 2017-ës në Dibër ministrit të Energjitikës, Damian Gjiknuri, i cili pas tre mandateve në Gramsh zhvendoset në veri të vendit, për të përsëritur qershorin e ardhshëm atë që bëri për bashkinë.
Rama synon që në Dibër të rrisë investimet shtetërore duke pasur si të ngarkuar një nga njerëzit më të fuqishëm të kabinetit që kontrollon fonde të mëdha.
Pra, socialistët në Dibër kësaj radhe do të kenë një kryesues liste me origjinë nga zona e Bregut por që është lindur dhe rritur në Tiranë.
Në vitin 2013, kryesues i listës së Dibrës ishte Ulsi Manja, që sipas të gjitha gjasave nuk do të jetë më deputet, dhe ka gjasa të rihyjë sërish në institucionet e drejtësisë.
Me Gjiknurin, Dibra bëhet precedent i dytë që ka një deputet të majtë nga zona e Bregut, pas Paskal Milos, i cili u zgjodh në vitin 2001, si parlamentar në zonën e Fushë-Çidhnës, Zall-Dardhës e Rreçit, një zonë elektorale e djathtë tradicionalisht.
Ish-ministri i Jashtëm arriti të krijojë një komunikim efikas me dibranët, që rininë e zonës e kishin me shumicë emigrantë në Greqi dhe Milo loboi që një pjesë e madhe e tyre të punojnë në shtetin helen me viza të rregullta sepse atëherë nuk ishte liberalizimi i vizave.
Ndërsa Gjiknuri do të ketë tjetër “armë” politike, por sërish përdorimin e të mirave që të jep pushteti.
Investimet në transformatorë dhe ndoshta edhe ndonjë amnisti në faturat e dritave, pritet që të jetë marrëdhënia e re në zgjedhjet parlamentare.
Por selia e PS-së nuk di asgjë rreth kësaj strategjie që po gatuhet në fshehtësi vetëm nga Edi Rama dhe Damian Gjiknuri.
Ministri i Energjitikës është i vetmi që tashmë e ka të siguruar zonën ku do të kandidojë, falë edhe rezultatit që arriti në zgjedhjet e 11 shtatorit.
Ndërsa Bulqiza i është lënë në autonomi LSI-së, Gjiknuri pritet të bëjë një ofensivë edhe në zonën e Matit që përfshihet në qarkun Dibër.
Jo më kot PD-ja zgjodhi një deputete nga Mati për të zëvendësuar Sherefedin Shehun, pasi e djathta e shikon më ftohtë Dibrën pas humbjes së bashkisë.
Dibra duket se është e vetmja zonë që pranon përfaqësues nga jugu ekstrem , ndërkohë që po të ndodhë e kundërta do të ishte bëtë “gjëma”.
Dibra, përveçse një zonë delikate në marrëdhëniet politike që gjithmonë surprizon dhe nuk krijon bastione, është treguar edhe më tolerantja dhe më “kozmopolitja” në mungesën e lokalizimit të ngushtë. /tesheshi.com/
