Një sherr i përgjakshëm ka ndodhur në qytetin e Laçit, në të cilin është përfshirë edhe deputeti i Partisë Socialiste, Armando Prenga, banor i këtij qyteti.
Gjithçka ka ndodhur në mesnatë, ku si në një skenë filmi western një turmë e madhe njerëzish janë përleshur me armë zjarri, thika, shkopinj bejsbolli dhe leva.
Nga kjo përleshje, ka si rezultat gjashtë persona të plagosur, ndërmjet të cilëve dy në gjendje të rëndë, në mesin e të cilëve dhe vëllai i deputetit socialist, 34 të arrestuar, përfshirë parlamentarin Armando Prenga, si dhe një situatë të nderë që po përdoret politikisht, duke i hedhur minutë pas minutë një dozë helmi, vetëm e vetëm për të përfituar, por pa pritur informacionet dhe për të bërë një analizë reale.
Siç mësohet paraprakisht, ngjarja ka pasur si shesh përplasje një bar dhe sheshin para komisariatit të policisë së Laçit, ku ka ndodhur sherri dramatik.
Një konflikt pronësie mes familjes Cali dhe Prenga ka qenë shkaku i përplasjes së madhe, për një tokë në zonën e Luginës së Patokut.
Mnjëherë pas ngjarjes, trupat e RENEA-s kanë mbërritur në Laç, të cilët kanë arrestuar menjëherë në flagrancë deputetin, Armando Prenga dhe kanë ndaluar 34 persona të përfshirë në ngjarje.
Policia ka njoftuar Prokurorinë e cila ka bërë gati shkresat për t’i kërkuar Kuvendit autorizimin për ta arrestuar juridikisht deputetin Prenga.
Parlamentari i mazhorancës, Armando Prenga, akuzohet se ka qenë i përfshirë në sherrin masiv në Laç. Veç kësaj, Prenga akuzohet edhe për kundërshtim të forcave të policisë.
Prenga është zgjedhur deputet i Qarkut të Lezhës për një mandat të dytë më 23 qershor 2013, ku mbuloi rrethin e Kurbinit.
Pas ngjarjes kanë reaguar menjëherë eksponentët e lartë të opozitës. Kryetari i PD-së, Lulzim Basha, deklaroi në një status në facebook se Rama e Tahiri po manipulojnë provat duke mos dhënë asnjë informacion. Ndërkohë ish-kryeministri Berisha deklaroi se deputeti i PS-së ka plagosur katër persona. Basha, ndërkaq bëri thirrje për “zhdukjen e kriminelëve nga Parlamenti i Shqipërisë”.
Policia pritet të japë një njoftim të detajuar mbi zhvillimet e ngjarjes që ka ndodhur në mesnatë. Siç mësohet, njoftimi pritet të bëhet i përbashkët me Prokurorinë pas verifikimit të të gjitha provave. Policia shpërndau një foto të deputetit Armando Prenga pas arrestimit, në ambjentet e Drejtorisë së Policisë së Tiranës, ku ndodhet edhe aktualisht.
/tesheshi.com/
