Edhe në Maqedoni kërkohet dekriminalizimi i politikës. Dhe kjo nga PDSH-ja, partia në opozitë e drejtuar nga Menduh Thaçi. Orhan Ibrahimi, deputet i saj, kërkoi që urgjentisht të miratohet ligji për dekriminalizimin e politikës në Maqedoni, duke thënë se partia shqiptare në pushtet BDI, drejtohet nga njerëz që dyshohen për skandale të ndryshme, por që sipas tij këto raste nuk zbardhen për shkak se edhe pushteti gjyqësor është i mbushur me gjykatës dhe prokurorë të përfshirë në krim.
“Sot ne kemi këtu deputetë që kanë thyer procesin zgjedhor, kanë hyrë me revole në vendvotime, ka qenë i ndaluar nga policia dhe pushteti e ka liruar brenda një muaji, ndërsa sot është shef i grupit parlamentar të BDI-së. Kemi ministër që hetohet prej institucioneve amerikane për korrupsion të aferës ‘Magjar Telekom’, për të njëjtën aferë dyshohet edhe deputeti dhe lideri i BDI-së. Por, nuk shohim që procedohen këto lëndë prej pushtetit gjyqësor këtu”, u shpreh Ibrahimi. /tesheshi.com/
