Amerikanët kanë vendosur të ndërtojmë një kompleks të ri diplomatik në Prishtinë dhe inagurimin e fillimit të punimeve kanë vendosur ta bëjnë këtë 5 maj.
Por cila është historia 16-vjeçare e kësaj ambasade në Kosovë?
Hapja e Zyrës Amerikane në Prishtinë, para 19 viteve, në 6 qershor 1996, që u bë nga Nënsekretari amerikan i Shtetit, Xhon Kornblum, shënoi vendosjen e pranisë amerikane në Kosovë në rrethana të veçanta. Fillimisht, Zyrtari i USIA-as (Agjencia Informative Amerikane), Majkëll Mekllellën (Michael Mçlellan) më 22 maj 1996 ka mbërritur në Prishtinë për të udhëhequr punët në hapjen e Zyrës së këtij shërbimi.
Ishte kjo përfaqësia e parë e një shteti në Kosovë, hapja e së cilës ishte festë për kosovarët dhe u përjetua si një moment shumë i rëndësishëm dhe historik për të ardhmen, ashtu sic raportonte korrespondenti i ATSH-së Behlul Jashari atë kohë në Prishtinë.
Ndërsa, në mëngjesin e pas natës historike të 24 marsit 1999 të ndërhyrjes shpëtimtare së NATO-s për Kosovën e popullin e saj, korrepondenti i ATSH-së nga Prishtina ka raportuar edhe se se forcat serbe gjatë natës kishin bërë sulme dhe vrasje të tjera në familjet dhe vendbanimet shqiptare, kishin djegur edhe selitë e institucioneve të rëndësishme kosovare e ndërkombëtare, përfshirë zyrat që ndodheshin në një shtëpizë shkrimtarësh që ishte bërë seli e Presidencës dhe e institucioneve tjera të Republikës së Kosovës, atëherë të panjohur ndërkombëtarisht, dhe Zyrën e SHBA-ve në Prishtinë.
Pas përfundimit të luftës, Zyra e SHBA-ve në Prishtinë (USOP) filloi të punojë në shtator të vitit 1999. USOP përfaqësonte Departamentin e Shtetit të SHBA-ve, Agjencionin për Zhvillim Ndërkombëtar të SHBA-ve (USAID), Departamentin për Drejtësi dhe Departamentin për Mbrojtje. Më 6 prill 2008 Zyra e SHBA-së në Prishtinë u bë Ambasadë, ndërsa më 18 korrik, po atë vit historik të shpalljes së pavarësisë, Tina Kaidanow është betuar si ambasadore e parë amerikane për Republikën e Kosovës.
Në 1 korrik 2009 Prishtina ndau 5 hektarë truall për ndërtimin e objektit të ri të ambasadë së SHBA-ve në Kosovë. Atëherë kryetari i komunës së Prishtinës Isa Mustafa dhe ambasadorja amerikanë në Kosovës Tina Kajdanow, nënshkruan Memorandumin e Mirëkuptimit për dhënien e truallit në shfrytëzim Ambasadës Amerikane, në lagjen Arbëria të kryeqytetit.
Memorandumi është edhe një shembull i forcimit të lidhjeve ndërmjet SHBA-së dhe Kosovës, u theksua në ceremoni. Pavarësinë e Kosovës të shpallur në 17 Shkurtin historic 2008 Shtetet e Bashkuara të Amerikës e kanë njohur që në ditën e parë pas shpalljes, kur e njohën edhe Mbretëria e Bashkuar, Franca, Shqipëria, Turqia, Afganistani dhe Kosta Rika.
