Antonio Conte është trajneri i ri i Tottenhamit, ka bërë të ditur klubi nga Londra në faqen zyrtare.
Conte nënshkroi një kontratë me Spursat deri në verën e vitit 2023 me opsionin për të zgjatur bashkëpunimin.
“Jam shumë i lumtur që jam rikthyer në punë në Premier League në një klub që ka ambicie të mëdha. Mezi pres të filloj punën për t’i përcjellë ekipit dhe tifozëve pasionin, mentalitetin dhe vendosmërinë që më kanë dalluar gjithmonë, si lojtar dhe si trajner”, tha Conte në prezantim.
Eksperti italian po rikthehet kështu në Premiership, ku jo shumë kohë më parë drejtoi me shumë sukses Chelsea-n. Nën drejtimin e tij, blutë fituan Premier League në sezonin 2016/17.
Angazhimi i fundit i Contes ishte në stolin e Interit me të cilin fitoi Serinë A dhe më pas u largua nga klubi. /tesheshi.com/
