Presidenti rus Vladimir Putin të dielën propozoi bisedime të drejtpërdrejta paqeje me Ukrainën më 15 maj në Stamboll.
Putini iu drejtua publikut disa orë pas përfundimit të një pauze tre-ditore të vetëshpallur në sulmet ndaj Ukrainës.
Ai tha se Rusia po propozon bisedime të drejtpërdrejta me Ukrainën në Stamboll më 15 maj në një përpjekje për të “eliminuar shkaqet rrënjësore të konfliktit” dhe “të arrijë rivendosjen e paqes afatgjatë dhe të qëndrueshme”.
Rusia pushtoi Ukrainën në shkurt të vitit 2022.
“Nuk ishte Rusia ajo që i ndërpreu negociatat në vitin 2022. Ishte Kievi. Megjithatë, ne propozojmë që Kievi të rifillojë negociatat e drejtpërdrejta pa asnjë parakusht”, tha Putin, duke iu referuar negociatave të dështuara menjëherë pas pushtimit rus.
“Ne u ofrojmë autoriteteve në Kiev të vazhdojnë negociatat që të enjten, në Stamboll”, tha Putin.
“Propozimi ynë, siç thonë ata, është në tryezë, vendimi tani varet nga autoritetet ukrainase dhe kujdestarët e tyre, të cilët duket se udhëhiqen nga ambiciet e tyre personale politike dhe jo nga interesat e popullit të tyre.”
Propozimi evropian për t’i dhënë fund luftës
Fuqitë e mëdha evropiane mbështetën të shtunën një armëpushim 30-ditor pa kushte në Ukrainë, të mbështetur nga Presidenti i SHBA-së Donald Trump, dhe kërcënuan Putinin me sanksione të reja “masive” nëse ai nuk i pranon ato brenda disa ditësh.
“Ne jemi të përkushtuar për negociata serioze me Ukrainën. Qëllimi i tyre është të eliminojnë shkaqet rrënjësore të konfliktit, të vendosin paqe afatgjatë dhe të qëndrueshme nga një perspektivë historike”, tha Putin.
Ai tha gjithashtu se “Rusia ka ofruar disa herë iniciativa paqeje, por autoritetet e Kievit nuk u janë përgjigjur asnjërës prej tyre”.
Të enjten, Putini shpalli në mënyrë të njëanshme një armëpushim në luftën në Ukrainë, i cili skadoi në mesnatë.
Presidenti ukrainas Volodymyr Zelensky tha se gjatë asaj periudhe sulmet nuk u ndalën dhe akuzoi Putinin se vetëm po bënte sikur respektonte armëpushimin për të festuar 80-vjetorin e fitores së Bashkimit Sovjetik ndaj Gjermanisë naziste në Luftën e Dytë Botërore me një paradë të madhe ushtarake. /tesheshi.com/
