Shqiptarët e Turqisë vazhdojnë të ruajnë traditat e trashëguara nga të parët e tyre, madje nuk ngurrojnë të harxhojnë aq sa për të blerë një automobil për kostumet folklorike tipike shqiptare.
Çmimet e veshjeve për natën e kënasë dhe atë të dasmës kapin shifrën e 10 -15 mijë lira, shifër kjo që përkon me afro 5 mijë dollarë.
Adem Serbest, një nga tregtarët dhe pronarët e një dyqani mode në qytetin e Bursas që qep me qira dhe tregton veshje folklorike shqiptare dhe ballkanase thotë se ai ka arritur të sjellë nga Ballkani kostume shumë të kërkuara.
Serbest pohon se veçanërisht familjet me origjinë shqiptare këtu organizojnë “natën e kënasë” ose siç e quajnë ata vetë “natën e shallvareve”. Për këtë natë thotë Serbest këto familje shpenzojnë 750 deri në 2 mijë lira turke për të qepur një palë shallvare tradicionale folklorike shqiptare.
“Shpesh herë nuset shqiptare këtu preferojnë të blejnë edhe rroba të gatshme tradicionale shqiptare ose t’i marrin me qira ato”, – thotë Serbest dhe shton më tej se krahas këtyre ka dhe nga ato që i bëjnë me porosi këto veshje. Sipas Serbest një palë shallvare me porosi mund të kushtojnë deri në 5 mijë lira turke (rreth 1 826 dollarë).
Në shtëpinë e modës që unë drejtoj nuk vijnë vetëm shqiptarë thotë Serbest dhe sqaron se të interesuar krahas ballkanasve ka edhe persona që nuk kanë të bëjnë me këtë rajon.
“
Kostumet tradicionale folklorike që ne disponojmë përbëhen nga këmisha, brezi dhe kurora. Në këto veshje një nga më të preferuarat është dhe xhybeja (veshje karakteristike e gruas myslimane, një mantel i gjatë deri në gju), e cila është e përgatitur me qëndisje të shumta dhe motive tradicionale.
Nuset shqiptare këtu krahas kostumit tradicional porosisin edhe 6 – 7 fustane të veçanta me qëndisje. Normalisht edhe kostoja e këtyre veshjeve është goxha e lartë. Vajzat shqiptare i pëlqejnë shumë rrobat e qëndisura me motive tradicionale. Për këtë arsye ato nuk u ikin shpenzimeve. Për natën e kënasë dhe atë të dasmës një vajzë shqiptare shpenzon 10 deri në 15 mijë lira”,- thotë ndër të tjera pronari i një dyqani mode në qytetin e Bursës në Turqi. Siç dihet në këtë qytet jetojnë një numër i konsiderueshëm qytetarësh më prejardhje shqiptare.
