Nesër pritet që në Tiranë të ketë jo më salcë, apo kimë që ka si bazë domatet e shtrydhura, por ndoshta edhe mjete shpërthyese me bojë apo lëngje që mund të merren në kanale, që s’është mirë që t’í përmendim në një shkrim. Po këtë, e kanë thënë përfaqësuesit e grupimit më të ri revolucionar në vend “Organizata Politike”, të cilët nesër do të protestojnë përpara ministrisë së Arsimit.
Si asnjëherë më parë, përfaqësuesit e këtij grupimi kanë qenë njëkohësisht në tre televizione, përkatësisht në emisione debati. Në “Opinion”, “Tonight Ilva Tare” dhe “Dritarja” e Xhungës. Ajo që ra në sy mbrëmë ishte gjuha e ashpër e përdorur nga protagonistë që i lidhte qëndrimi politik, por që janë edhe kundërshtarë të kryeministrit Edi Rama. Për shembull te “Opinion”, Armand Shkullaku dhe Mark Marku, bënë thirrje hapur për t’u përdorur mjetet politike të Vetëvendosjes në Tiranë, pasi sipas tyre: “nuk ka rrugë tjetër”. Dhe sipas informacioneve, ka një sponsorizim të fortë ndaj revolucionarëve të rinj që t’u hapen të gjitha “banaqet” televizive dhe të krijojnë një frymë guerrilje në Tiranë. Po pse?
E thjeshtë! Edi Ramën nuk e rrëzuan dot dhe sot është më i fortë se kurrë. Ministri i Jashtëm gjerman, Steinmejer takoi ministrin Bushati duke përgatitur vizitën e Edi Ramës më 28 nëntor në Berlin. Dhe fraza e lëshuar nga shefi i diplomacisë gjermane ishte mjaft e qartë: “Miratimi i reformës është shprehje e një zhvillimi dhe e jo konsolidimi të brendshëm politik. Kjo çon në konstatimin se Shqipëria, çka nuk pritej nga shumë persona në Gjermani, është shndërruar në një “spirancë” stabiliteti në vitet e fundit në Ballkanin Perendimor dhe është një partner i ngushtë, jo vetem i të gjithë evropianëve së bashku, por edhe për Gjermaninë”, tha Steinmeier në konferencën e shtypit me homologun shqiptar Ditmir Bushati.
Por nisur nga kjo situatë, po rikthehet viti 2002, kur Fatos Nano u zgjodh kryeministër dhe në Tiranë u krijua Mjaft-i i Erion Veliajt, që tani është njeriu më i rëndësishëm i vendit pas Edi Ramës. Edhe këtë here, po synohet një “Mjaft” i ri, por që nuk gjuan me simbole, por me gjëra më të forta. A do t’ja arrijnë të dëmtojnë Ramën?
Fakt është që do të ketë një luftë të egër, pasi bëhet fjalë o për të fituar ose për tu larguar nga politika. LSI-ja e Metës, tashmë ka bërë gati plaçkat për largim dhe do ta bëjë në dhjetor, por natyrisht jo në “atmosferë palmash” për Ramën, pasi të ketë hapur negociatat në Berlin, por duke i’a sfumaur këtë avantazh, siç ndodhi me vizitën në Shtëpinë e Bardhë, kur ndodhi si “rastësisht” një avion me hashash./tesheshi.com/
