Një histori që përfshin një pronare të njohur picerie në Itali, e cila akuzohej se kishte krijuar një incident me një “klient”, pasi ky i fundi ankohej për praninë e një çifti homoseksual dhe një fëmijë me aftësi të kufizuara pranë tij në restorant, përfundoi në mënyrë tragjike. Në moshën 59-vjeçarje, Giovanna Pedretti u gjet e vdekur në një lumë, ndërsa autoritetet italiane po shqyrtojnë edhe mundësinë e një vetëvrasjeje.
Gjithçka nisi pas përgjigjes së Pedrettit ndaj një klienti, i cili u ankua se ishte ulur pranë një çifti homoseksual dhe një fëmije me aftësi të kufizuara, për të cilën 59-vjeçarja u përgjigj ndër të tjera se nuk është më i mirëpritur në restorantin e saj.
Mirëpo, sipas publikimeve italiane, Pedretti e ka sajuar këtë polemikë me qëllimin për të nxitur diskutime (pozitive) për picerinë e saj. Këto akuza mësohet se kanë shkaktuar vetëvrasjen e 59-vjeçares, e cila u gjet e pajetë të shtunën në brigjet e lumit Lambro pak larg nga Milano.
Siç shkruan Daily Mail, fillimisht u gjet makina e shefes së kuzhinës, ndërsa trupi i saj u gjet pak më larg, me informacionin se megjithatë, nuk u gjet asnjë letër vetëvrasjeje.
Polemika, e përqendruar rreth Pedrettit, filloi gjatë verës kur një koment u postua në faqen e picerisë në Facebook ku shkruhej: “Isha ulur pranë dy burrave homoseksualë, nuk e vura re menjëherë sepse ata të vetëpërmbajtur. Pranë tyre ishte dhe një djalë në një karrige me rrota që kishte vështirësi të hante. Më falni, por nuk u ndjeva rehat”.
Këtij komenti, 59-vjeçarja iu përgjigj se “restoranti ynë është i hapur për të gjithë dhe gjithçka që kërkojmë nga klientët tanë është të respektojnë të gjithë. Fjalët nënçmuese që përdore për klientët e tjerë që nuk të shqetësonin më duken të panevojshme dhe të këqia. Ne nuk i zgjedhim klientët tanë bazuar në orientimin e tyre seksual apo nëse ata janë ose jo me aftësi të kufizuara. Ju lutemi mos ejani më nëse nuk gjeni njerëzimin që ju mungon.”
Megjithatë, pak kohë më vonë, komenti origjinal dhe përgjigja e Pedrettit u fshinë, një lëvizje që ngjalli dyshime me influencuesen dhe yllin televiziv Selvagia Lucarelli që akuzoi biznesmenen 59-vjeçare për “redaktim fotografish” dhe përpjekje për t’u shfaqur si heroike në mbrojtje të homoseksualëve dhe personave invalidë.
Raportime shtesë nga zona ku ndodhet piceria thonë se restoranti shpeshherë ishte plot me klientë duke përjashtuar mundësinë që vdekja e saj të ishte për shkak të një problemi financiar. /tesheshi.com/
