.
Menjëherë pas vendimit të Parlamentit për të miratuar kërkesën e Prokurorisë së Përgjithshme, Policia ka ekzekutuar urdhër-ndalimin duke arrestuar deputetin e Partisë Kristian Demokrate, Mark Frroku në një lokal në pronë të familjes së tij dhe deputetin e përjashtuar nga PS Tom Doshi në banesën e tij.
Policia e Tiranës në bashkëpunim me forcat Shqiponja ka arrestuar sot rreth orës 16:33 deputetin Mark Frroku brenda biznesit të tij, ndërkohë që ka shkuar në policinë e Tiranës edhe deputeti tjetër Tom Doshi.
Arrestimi i Frrokut është bërë menjëherë pas miratimit të vendimit të Kuvendit për heqjen e mandatit të dy deputetëve si dhe çeljen e procedurave për veprimet e policisë dhe të prokurorisë në lidhje me hetimin e çështjes. Policia ka mbërritur edhe në shtëpinë e Tom Doshit ku prej disa minutash është duke ushtruar një kontroll në banesën e këtij të fundit ashtu sikurse kishte kërkuar edhe prokuroria më parë.
Ndërkaq, deputeti Tom Doshi është arrestuar në shtëpinë e tij në orën 17:15. Arrestimi i Doshit është bërë pas kontrollit që forcat e policisë kanë ushtruar në banesën e tij. Tashmë të dy deputetët e arrestuar do të qëndrojnë për 48 orë në ambientet e policisë nga ku do të njihen më pas me vendimin. Avokati i Doshit deklaroi se arrestimi pa u marrë vendimi nga Gjykata e Lartë, shënon një arbitraritet
Pas lajmit për arrestimin e dy deputetëve Tom Doshi ka reaguar përmes një statusi në Facebook ku shkruan se ndodhet në shtëpinë e tij dhe se nuk do të largohet por do të përballet me akuzat
(tesheshi.com)
