Situata kaotike që ka përfshirë Parlamentin e Kosovës ka shtyrë Kryesinë e Kuvendit të marrë një vendim të çuditshëm. Është vendosur që seanca e rradhës plenare të mbahet në një kohë jo të zakonshme, në ora 16:00 e caktuar për ditën e premte.
Vendimi që seanca të mos mbahet në ora 10:00 të mëngjesit, siç ishte vepruar çdo herë, ka revoltuar partitë opozitare.
Ky ndryshim, padyshim që është marrë pas incidenteve që kanë ndodhur në seancat e kaluara plenare ku gazi lotësjellës dhe vezët ishin kryefjala e tyre.
‘Koalicioni i natës’
Tri partitë opzitare VV, AAK, NISMA përmes një deklarate kanë thënë se caktimi i seances për në orët e mbrëmjes më së miri e paraqet punën e koalicionit qeverisës, dhe e kryetarit të Kuvendit. “Ata punojnë natën, sa më larg syve të publikut, në kundërshtim të plotë me praktikat e deritashme parlamentare. Ashtu siç i kanë arritur marrëveshjet fshehtas, tash po duan t’i përvjedhin ato me këto seancat të natës, vazhdon deklarata . Nuk do të ketë vazhdim të seancës për sa kohë që nuk ka tërheqje nga marrëveshjet. Protestën nuk do ta ndalim pavarësisht se në çfarë ore mbahet seanca dhe sa kërcënuese është policia e pushtetit. Qeveria e ka sjellë këtë situatë të jashtëzakonshme në Kosovë”, thuhet në reagimin e opozitës.
Ndryshe, nëse mbahet seanca e së premtes, pritet të shqyrtohen dy projektligje dhe do të emërohen anëtarët e disa institucioneve të pavarura.
/tesheshi.com/
