Siç u njoftua pak ditë më parë edhe nga tërë shtypi britanik, Marko Grujiç u cilësua si blerja e parë e Liverpulit që prej ardhjes së Jurgen Klopit si trajner.
Marrëveshja me talentin serb të Crvena Zvezdës, apo, ndryshe, Yllit të Kuq, parasheh një kontratë pesëvjeçare, ndërsa shuma që do të paguhet për transferimin është 7 milionë euro. Klubet kanë rënë dakort që pas firmosjes së kontratës Grujiç të huazohet sërish te klubi mëmë, ku do të lejohet të luajë deri në fund të sezonit.
Deri këtu duket se gjithçka shkon mirë, por në skenë del babai i futbollistit, i cili është kundër transferimit dhe i merr pasaportën djalit, duke ia bërë të pamundur fluturimin për në Angli.
Goran Grujiç beson se djali i tij po shtrëngohet nga Crvena Zvezda që të transferohet në janar, pasi klubi i Beogradit ka nevojë për para.
“Nuk do t’i lejoj të ma shkatërrojnë djalin,” janë fjalët e të atit. I cili tregon se mbi Marko Grujiçin ka shumë presion nga klubi, e se tërë ditën i telefonojnë duke e nxitur të nënshkruajë kontratën.
Te presioni ai shton dhe titujt e gazetave serbe: “Numri 8 i Xherardit po pret për të,” “Klopi i telefonoi atij”, etj.
“Pasaporta e tij është në duart e mia, dhe ai nuk do të shkojë askund,” ka deklaruar Goran Grajiç për mediat e Beogradit. Ai kërkon që i biri të qëndrojë deri në fund të sezonit te Crvena Zvezda, kur edhe çmimi do të jetë shumë më i lartë.
Një pjesë e dyshimeve të babait të futbollistit të ri të talentuar kanë rezultuar të vërteta, ndërsa klubi serb ka njoftuar në një deklaratë të bërë sot se nëse nuk merren paratë nga shitja e Markos Grujiçit, Crvena Zvezda do të rrënohet financiarisht.
Marko Grujiç është formuar si futbollist në akademinë e Crvena Zvezdës, dhe debutimin në ekipin e parë e bëri në moshën 17-vjeçare, në maj të 2013-ës.
Ai ka shënuar pesë gola në këtë sezon për ekipin e tij, dhe ishte pjesë e kombëtares serbe të moshave nën 20 vjeç që fitoi Kupën e Botës në Zelandën e Re qershorin që lamë pas.
Veç Liverpulit, atë e kanë kërkuar dhe Anderlehti dhe Shtutgarti. /tesheshi.com/
