Manuel Kontreras, i cili vuante një dënim të bashkuar prej 500 vitesh për krime kundër njerëzimit, vdiq në moshën 86-vjeçare në një spital ushtarak të Santiagos.
Gjenerali Kontreras drejtoi gjatë diktaturës ushtarake të Kilit agjencinë e spiunazhit, e cila rrëmbeu, torturoi dhe vrau mijëra njerëz. Ai vdiq një ditë më parë në spital, ku ndodhej prej kohësh për shkak të gjendjes së rënduar shëndetësore.
Me të mësuar për vdekjen e tij, një numër i kufizuar njerëzish u mblodhën para spitalit duke tundur flamujt kilianë e duke thirrur “Vrasës!”
Kontreras do të formonte agjencinë e spiunazhit DINA pas puçit ushtarak në vitin 1973, e do të bëhej njeriu i dytë më i fuqishëm në vend pas gjeneralit Augusto Pinoçet.
Ish-shefi i spiunazhit pati rol të dorës së parë në masakrat ndaj qytetarëve kilianë, të kryera nga një prej juntave më të egra në Amerikën Latine.
Sipas një raporti zyrtar, 40.018 qytetarë u burgosën, u torturuan apo u masakruan gjatë diktaturës së viteve 1973-1990.
I ndjeri famëkeq mbikëqyri personalisht kapjen e mijëra majtistëve pas puçit ushtarak, duke e kthyer stadiumin kombëtar të Santiagos në një burg të hapur, kur qindra persona provuan tortura çnjerëzore, e shumë prej tyre u zhdukën më pas.
Kontreras qe fillimisht mes njerëzve më të besuar të Pinoçetit, por në fund ata nisën të shkëmbejnë akuza mes tyre.
Vetë diktatori Augusto Pinoçet, i cili rrëzoi qeverinë e Salvador Aljendes në vitin 1973 dhe qëndroi në pushtet deri në 1998-ën, vdiq në vitin 2006 pa arritur të gjykohej për dhunim të të drejtave të njeriut. /tesheshi.com/
