Nikolla Gruevski e sheh si një komplot platformën e përbashkët të partive shqiptare, por nuk ka përmendur asnjë emër, as atë të Edi Ramës, i cili konsiderohet promotori dhe nxitësi i platformës, duke u bërë i urryer madje nga një pjesë maqedonasish. Duke folur për “Dnevnik”, Gruevski ka thënë se platforma është nxitur nga “politikanë dhe diplomatë të huaj dhe përmes saj synohet që të shmanget koalicioni me partinë e tij për qeverinë e re”.
Dhe ajo që më së shumti e shqetëson kreun e VMRO-së, i cili tashme ka dhe mandatin për formimin e qeverisë së re, por që nuk mundet assesi ta jetësojë pa aleancë më shqiptarët, është kërkesa për dy-gjuhësinë. Sipas tij, ajo nuk ka përse u duhet shqiptarëve në zonat ku ata nuk jetojnë, duke shtuar se shqiptarët kanë më shumë nevojë për punësime të reja, paga më të larta dhe standarde më të larta jetese”.
Më tej, Gruevski ka shfaqur frikën e tij ndaj faktit që aleati BDI mund të zgjedh LSDM-në e Zaevit për aleancë qeveritare. Kjo e fundit i ka shtuar deklarimet optimiste, edhe pse humbëse, duke shërbyer ato si një sinjal që pushteti po i troket në derë.
“Nëse BDI zgjedh të shkojë në koalicion me partinë e dytë, në vend të asaj që ka dalë forcë e parë, zgjedh të shkojë me atë që ka humbur dhe jo me atë që ka fituar, kjo do të shënojë një praktikë të re, të cilës ne gjithsesi do t’i përshtatemi sot dhe në të ardhmen”, tha Gruevski.
Tashmë, BDI dhe Ali Ahmeti ndodhen në një pozicion historik, në provën e madhe mes pushtetit në kurriz të kauzës shqiptare e të kundërtës. /tesheshi.com/
