Kryeministrit Nikolla Gruevski nuk po i shkon për shtat me sa duket prania e ndërkombëtarëve në bisedimet për zgjidhjen e krizës politike në Maqedoni.
Ardhja e komisionerit Johanes Han në vazhdën e bisedimeve të ardhshme midis liderëve partiakë është imponuar nga ana e LSDM-së me bllokimin artificial të bisedimeve për disa ligje, sipas Gruevskit. LSDM-ja është e vetëdijshme se do t`i humbasë zgjedhjet, dhe për këtë arsye po i pengon proceset.
“Këto ligje për të cilat do të vijë ai kemi mundur praktikisht t`i kalojmë vetë. Ata gjetën rrugë artificiale që përsëri ta bllokojnë procesin, duke luftuar për t’u ikur zgjedhjeve, pasi ky është qëllimi kryesor i tyre për momentin,” shprehet Gruevski.
Në këndvështrimin e tij, LSDM-ja është e vetëdijshme se do t`i humbasë zgjedhjet e ardhshme, ndaj ato nuk janë të dëshirueshme, sado që ajo flet për të kundërtën, pasi ashtu siç ne po porosisim anketa për të shikuar disponimin e qytetarëve, po ashtu po bën dhe ajo.
“Ata janë të vetëdijshëm se çka i pret në prill,” deklaroi kryeministri Gruevski në një intervistë për Kanal 5.
Gruevski foli në këtë intervistë edhe për punën e legjislacionit të zgjedhjeve, duke treguar se është luftuar për votimin e diasporës dhe që të mos ketë Badinter në KSHZ, çka nënkupton marrjen e çfarëdo vendimi pa u penguar nga përfaqësuesit shqiptarë.
“Kemi bërë kombinime të tjera që nuk mund të jenë ideale, por më të mira se çka ishte ofruar më parë, që votimet në KSHZ të pezullohen me votën e partive të bashkësive më të vogla etnike, gjë e cila u jep një avantazh të madh atyre,” përfundoi Gruevski. /tesheshi.com/
