Shefi i diplomacisë greke, Nikos Kotzias, ka nisur një vizitë zytare në Kosovë, ndërkohë që pasdite dhe nesër do të jetë në Tiranë për të vazhduar më pas turin në Bosnjë-Hercegovinë.
Në Prishtinë, Ministri i Jashtëm grek do të takohet me homologun e tij Hashim Thaçi dhe Kryeministrin e Kosovës, Isa Mustafa.
Vizita e parw e njw kryediplomati të Athinës në Kosovë është një zhvillim i rëndësishëm pasi tregon se “de fakto” Greqia njeh pavarësinë e Kosovës, së cilës i respekton protokollin shtetëror. Në fakt njohja e Kosovës bën pjesë në “paketën” që Kotzias i ka paraqitur Tiranës zyrtare në mënyrë që të arrihet ajo që Greqia e cilëson si “normalizim të marrëdhënieve”.
Në këtë paketë, pjesë e rëndësishme është edhe ndarja e kufirit detar në Detin Jon, i cili është shumë i rëndësishëm për vendburimet e naftës. Greqia synon të shesë të drejtat e përdorimit dhe sipas shumë analistëve, kompanite kineze kanë kërkuar që të marrin në koncension kërkimin dhe shfrytëzimin e hapësirave naftësjellëse.
Ndërkaq, ditën e nesërme, Kotzias do të zhvillojë një seri takimesh në Tiranë, ku përveç homologut të tij, Ditmir Bushati, ministri i Jashtëm grek do të takohet edhe me Kryeministrin Edi Rama, presidentin Nishani, Kreun e Kuvendit Meta, liderin e opozitës Lulzim Basha si dhe me përfaqësuesit e minoritetit grek. Bie në sy se në axhendën zyrtare mungon një takim me Kryepeshkopin e Kishës Ortodokse, Janullatos, takim që ka ekzistuar në axhenda sa herë që vizitonte Tiranën ndonjë zyrtar i lartë i Athinës.
Shefi i diplomacisë greke, Nikos Kotzias, do të zhvillojë për dy ditë; më 16 dhe 17 korrik, një vizitë në Bosnjë-Hercegovinë, si për të mbushur vakumin që u krijua si pasojë e mungesës së autoriteteve të Athinës në ceremoninë e 20 vjetorit të masakrës së Srebrenicës, që u zhvillua më 11 korrik në memorialin e Potoçarit. Megjithatë në axhendën zyrtare nuk është parashikuar ndonjë homazh në këtë memorial. Greqia ka shumë dritëhije në lidhje me Srebrenicën, pasi shumë vullnetarë greke kanë pmarrë pjesë përkrah forcave paramilitare çetnike serbe në gjenocidin ndaj popullsisë myslimane boshnjale.
/tesheshi.com/
