Princi i kurorës saudite, Mohammed bin Salman përsëriti kërkesat për përfundimin e menjëhershëm të operacioneve ushtarake në Rripin e Gaza-s dhe heqjen e bllokadës.
Bin Salman preku sulmet e Izraelit në Gaza në fjalimin e tij të hapjes në një samit të përbashkët të jashtëzakonshëm të Organizatës së Bashkëpunimit Islamik dhe Ligës Arabe, i cili filloi në Riad, kryeqyteti i Arabisë Saudite.
“Ky samit po mbahet në një moment të dhembshëm dhe të jashtëzakonshëm. Ne nuk e pranojmë dhe refuzojmë absolutisht këtë luftë të dhunshme, në të cilën mijëra civilë, duke përfshirë fëmijë, gra dhe të moshuar të vëllezërve tanë palestinezë, janë bërë viktima, dhe e cila gjithashtu synon vendet e adhurimit, spitalet dhe infrastrukturën”, tha Bin Salman.
Ai tha se Arabia Saudite që nga fillimi ka punuar me të gjitha palët dhe komunitetin ndërkombëtar për të mbrojtur civilët në Rripin e Gaza-s.
“Ne përsërisim kërkesën tonë për ndërprerjen e menjëhershme të operacioneve ushtarake në Rripin e Gaza-s, heqjen e bllokadës dhe hapjen e korridoreve humanitare. Theksojmë rëndësinë e lirimit të pengjeve dhe mbrojtjes së njerëzve të pafajshëm. Përpjekjet e Këshillit të Sigurimit të Kombeve të Bashkuara dhe komuniteti ndërkombëtar për të ndalur krizën humanitare si rezultat i sulmeve izraelite kanë dështuar”, theksoi Bin Salman.
Princi i kurorës saudite theksoi se duhet bërë një përpjekje e koordinuar dhe kolektive për të përballuar situatën fatkeqe.
“Ne hedhim poshtë agresionin dhe politikën e zhvendosjes së detyruar kundër banorëve të Gaza-s. Ne i konsiderojmë autoritetet pushtuese përgjegjëse për krimet e kryera kundër popullit palestinez. Jemi të bindur se e vetmja mënyrë për të garantuar sigurinë, paqen dhe stabilitetin në rajon është t’i jepet fund okupimit, rrethimit dhe vendbanimeve, për të marrë të drejtat legjitime të popullit palestinez dhe për të krijuar shtetin e tyre të pavarur me kryeqytet Al-Quds-in”, shtoi Bin Salman.
Sekretari i Përgjithshëm i Ligës Arabe, Ahmed Abu Ghaith, tha se sigurimi i një armëpushimi në Rripin e Gaza-s është një çështje prioritare për të cilën të gjithë duhet të punojnë.
Ai shtoi se do të ishte një proces i gjatë dhe i vështirë për t’i kthyer gjërat në normalitet në Gaza.
Ghaith theksoi se nuk do të ishte korrekte të flitej për të ardhmen e Gaza-s veçmas nga e ardhmja e Bregut Perëndimor dhe e Kudsit Lindor (Jerusalemit).
“Sigurimi i një armëpushimi në Gaza është një çështje prioritare për të cilën të gjithë duhet të punojnë dhe zgjidhin”, tha Abu Ghaith.
Ai deklaroi se ata nuk e pranojnë zhvendosjen e detyruar të palestinezëve në Rripin e Gaza-s, Bregun Perëndimor apo Al-Kuds Lindor.
“Zhvendosja e detyruar është një krim ndërkombëtar. Ai refuzohet nga palestinezët, arabët dhe bota,” theksoi Abu Ghaith. /tesheshi.com/
