Bill Gates, bashkëthemelues i Microsoft-it dhe një filantrop i njohur, ka akuzuar Elon Musk, drejtorin e Tesla-s dhe SpaceX, se me veprimet e tij po dëmton rëndë më të prekshmit në planet.
Në një intervistë me Financial Times, Gates reagoi ashpër ndaj vendimit të Musk për të ndërprerë mbështetjen për Agjencinë e Shteteve të Bashkuara për Zhvillim Ndërkombëtar (USAID), e cila ka shpërndarë ndihmë për vendet në zhvillim për vite me radhë.
Gates pretendon se mbyllja e USAID-it ka bërë që furnizimet mjekësore dhe ushqimet të mbeten në depo, duke rritur rrezikun e përhapjes së sëmundjeve të tilla si fruthi, HIV dhe poliomeliti.
“Imazhi i njeriut më të pasur në botë që vret fëmijët më të varfër në planet nuk është i bukur”, tha Gates për Financial Times, duke akuzuar Musk se po vepron nga injoranca dhe nga një keqkuptim i rolit të ndihmës ndërkombëtare.
Musk e ka quajtur më parë USAID-in një “organizatë kriminale” dhe ka pranuar se ndonjëherë ofron informacione të pasakta – siç është rasti kur e ngatërroi Gazën e Mozambikut me territorin palestinez.
Ndryshe nga Musk, Gates ishte më i butë me Donald Trump, duke thënë se ish-presidenti mund të mos ketë qenë në dijeni të pasojave të shkurtimeve të tij. Megjithatë, ai shprehu shqetësim se Trump mund të përpiqet të rrezikojë punën e fondacioneve si e tija duke eliminuar lehtësirat tatimore.
Gates kritikoi gjithashtu emërimin e Robert F. Kennedy Jr. nga Trump për Sekretar të Shëndetësisë, duke thënë se Kennedy “sulmoi vaksinat, dhe veçanërisht rolin tim… me shumë gënjeshtra”. /tesheshi.com/
